Nan lide pou ede polis Nasyonal la konbat bandi nan peyi a, Sekretè Deta ameriken an, Anthony Blinken anonse jodi vandredi 22 septanm 2023 a, gouvènman Biden-Harris la ap gen pou bay 65 milyon dola vèt pou PNH la. Responsab la fè anons sila nan okazyon 78yèm asanble jeneral Nasyonzini an nan vil New York.
Anthony Blinken fè konnen administrasyon ameriken an ap fè kou yo konnen pou ede lapolis la goumen kont gang, se pou sa li deklare jodi a nan yon ti kras tan y ap gen pou bay responsab polisyè yo 65 milyon dola.
Toujou nan sousi pou jwenn yon solisyon ak kriz peyi a, responsab ameriken an anonse vandredi sa sou kont Twitè li, Etazini ap gen pou sanksyone 5 pèsonalite ayisyen ki pap ka antre sou sòl ameriken an ankò. Daprè sa l di, moun sa yo ta gen men yo tranpe nan sipòte vyolans bandi yo nan peyi a.
Yon lòt kote, responsab Biwo Entegre Nasyonzini an Ayiti a (BINUH), Maria Isabel Salvador deklare bay jounal VOA kreyòl avan fen ane a, gouvènman ameriken an ap gen pou pibliye yon lis non moun y ap gen pou pran sanksyon kont yo.
Pou kounya, nan sa k gen pou wè ak entèvansyon peyi Kenya an Ayiti, sekretè deta ameriken an di misyon an ka vini nan kèk mwa ankò, toujou selon VOA Kreyòl.
Credit Photo: CNN
Atik sa se pwopriyete prive ©️ Gwoup Medya MAGHAITI 2023
