Nan yon lèt ki pibliye jodi jedi 16 mas la, Federasyon Entènasyonal Foutbòl (FIFA) la fè konnen se toujou komite nòmalizasyon yo te mete a ki gen dwa jere tèt Federasyon Foutbòl Ayisyen an.
Kontrèman ak sa ansyen prezidan Federasyon Foutbòl Ayisyen an, Yves Jean-Bart te fè konnen jou ki te premye mas 2023 a, nan sans pou te anonse l ap tounen nan tèt federasyon an, FIFA li menm nan bò pa l, fè konnen yo toujou kenbe menm komite nòmalizasyon an pou jere zafè foutbòl an Ayiti.
“Nou vle soulinye biwo konsèy FIFA a te deside 11 desanm 2020 sou baz atik 8 pa 2 estati FIFA yo, pou te nome yon komite nòmalizasyon pou FHF an, sa ki retire komite egzekitif FHF nan fonksyon l“, daprè sa responsab yo di nan lèt sila.
Paralèlman, nouvèl sa pa t pran tan pou jounalis fransè Romain Molina te reyaji sou li, kote l di sou kont twitè li “tankou m te anonse sa Yves Jean-Bart (Dadou) pa rejwenn pòs prezidan federasyon Ayisyen an, batay la ap kontinye“.
Pandantan sa, FIFA tou pwofite raple tout asosiyasyon ki gen lyen ak yo espesyalman Federasyon Foutbòl Ayisyen an gen pou obligasyon pou yo regle tout zafè yo san yo pa mele l ak yo ni eseye fè sa ki kont tout règleman yo genyen yo.
Nan sans sa, yo soulinye tout asosiyasyon ki pa respekte obligasyon yo genyen anvè enstitisyon foutbòl la, ap tonbe anba sanksyon.
N ap raple, Dadou Jean-Bart te fè anons li ap tounen nan tèt federasyon Foutbòl Ayisyen an nan kòmansman mwa mas ane sa, aprè Tribinal Abitral Espò(TAS) a te finn blanchi dosye vyòl ak tizonnay sou tifi li te enplike ladan l nan lane 2020 an.
Atik sa se pwopriyete prive ©️ Gwoup Medya MAGHAITI 2023
