Etazini libere youn nan akize nan lanmò Jovenel Moïse la pou 1.5 milyon dola vèt

Fredrick Bergmann se non sitwayen sa ki ta gen dwèt li tranpe nan lanmò ansyen prezidan Jovenel Moïse, ki jwenn liberasyon l sou siveyans ayè aprè midi vandredi 19 fevriye a. Selon sa “Miami Herald” rapòte jodia, akize a ta peye 1.5 milyon dola vèt pou l sòti nan prizon an.

Se jij federal Lauren Louis ki ta pran desizyon pou lage Fredrick Bergmann, alòske li te refize fè sa pou Walter Veintemilla ak Arcangel Pretel ki yo menm ap gen pou rete nan prizon pou yon ti tan ankò.

Jij la te presize se paske l gen dout sou Veintemilla ak Pretel pou yo pa kite teritwa Ameriken an ki fè l refize negosye pri pou 2 mesye yo ta jwenn libète yo.

Pou sa ki gen pou wè ak Antonio Intriago responsab CTU security a, li menm tou ap gen pou rete nan prizon, akòz avoka k ap defann li an te mande pou yo mete odisyon l lan pou yon lòt lè.

Yon lòtbò, malgre Lajistis ameriken deside lage Bergmann, li p ap gen dwa pou kite lakay li, dayè selon presizyon ki bay yo ta mete yon aparèy GPS(Global Positioning System) sou li. Akize a ap sèlman ka al wè paran l, daprè sa jounal Ameriken an di.

N ap raple Fredrick Bergmann te fè pati 4 moun ajan federal Ameriken yo te arete 14 fevriye pase a, nan kad dosye asasinay prezidan Jovenel Moïse la.

Atik sa se pwopriyete prive ©️ Gwoup Medya MAGHAITI 2023

Comments

commentaires