Pòtoprens jounen dimanch 7 me 2023 a._ Depi aprè gwo evenman ki te pase nan zòn Kanapevè ak Debisi a, kote pèp souvwen an te touye plis pase yon 20èn prezime bandi ki te gen gwo zam nan men yo, mouvman “Bw* Kale” a anvayi tout depatman peyi a. Anpil zòn deside kanpe goumen pou repouse atak sanzave yo ki pa deside depoze zam yo ni bay popilasyon an yon souf.
Pèp souvwen an gentan fil pou anpil prezime bandi nan pwogram “Bw* Kale” a, anpil move zafè, move kou kong, sa ki te gentan voye mesaj pou mande lapè, konsa gen lòt ki pi awogan k ap bay presyon pou yo kontinye entimide moun yo. Men se byen konte ak mal kalkile, sitwayen konsekan yo pa pran nan kraponnay, yo menm tou yo move kou kong y ap tann san manman yo vin atake yo pou yo riposte.
Men fòk nou di tou mouvman an plen feblès ladan li, ki lakoz li vin bese. Kòmkwa popilasyon an tèlman sou emosyon, li tèlman sibi mati pandan 5 dènye ane ki sot pase la yo, depi yon moun akize yon advèsè kòm bandi, pèp la mache pran akize a epi pase li a lenfinitif. Epitou, gen kèk grenn mawozo ki chita akize ansyen fanm yo t ap koze avèk li, men ki pa te janm reponn li pozitif. Nan konsa yo pran foto ak videyo kèk medam ki inosan, lage yo sou entènèt la epi rele yo madan bandi. Nan sans sa gen anpil inosan ki gentan viktim, gen anpil move je k ap tou pwofite regle koze pèsonèl yo… sa vin koz leve kanpe pèp la febli.
Yon lòt kote, gen yon pati moun ki pa janm sispann denonse mouvman “Bw* Kale” sou rezo sosyal yo, kòmkwa yo pa ankouraje vyolans sou kèlkeswa fòm li vini an. Jounalis Liliane Pierre Paul ak Jean Monart Mettelus denonse mouvman sila epi pran pozisyon kont li kategorikman menm jan ak anpil lòt moun. Nou menm nan MAGHAITI nou se demokrat tou, nou kwè nan yon sistèm jistis k ap fonksyone, kote chak enstitisyon yo jwe wòl yo kòmsadwa. Kote si yon gwoup moun pa respekte manman lwa peyi a, yo nan tout move zafè, yo nan koripsyon, y ap fè kadejak, y ap vòlè, y ap touye, y ap bale woule nan peyi a san kè sote… dwe gen yon sistèm jistis k ap ba yo santans epi pran mezi pou yo pa rekòmanse ankò. Kòm pa gen okenn fòm jistis nan peyi a, pèp souvwen an oblije bay repons yo. Sa lejitim, jijman popilè pa janm dous!
Se vre imaj yo chokan, imaj yo amè tankou fyèl lè n ap gade prezime bandi y ap rache ak manchèt epi lòt yo mete dife sou yo tou vivan. Se vre li pa nòmal pou se popilasyon an k ap bay tèt li jistis epi defann zòn li, men jan pwovèb la di a: “Lanati ap toujou konble vid yo poukont li”. Se paske pa gen leta ki fè se bandi k ap dirije katye yo, pa gen yon otorite k ap bay lòd epi fè respekte lalwa nan yon perimèt byen defini. Se menm jan an tou, depi gen enjistis, y ap touye moun yo tankou mouton san rezon, ap toujou gen mouvman tankou “Bw* Kale” menm jan te gen “Bwa Kayiman” nan epòk esklavaj la.
Gen gwoup enfliyansè ak jounalis Facebook ki pwofite sitiyasyon an pou kreye odyans la, yo pran plezi nan pibliye foto ak videyo moun kòmkwa se yo ki gen monopol enfòmasyon an pou yo di men kiyès ki bandi, men kiyès ki bon moun. Nou toujou atire atansyon lektè yo sou gwo danje pratik sila genyen ladan l. Yon moun paka gen tout pouvwa sa, yon grenn moun ki kache dèyè yon telefòn pa gen ase prèv pou li voye nou al tiye yon lòt oubyen kraze brize. Moun sa yo renmen lè gen gwo mouvman sa yo paske odyans lan ba yo anpil lajan sou entènèt la. Anpil ap ankouraje eklatman sosyal oubyen gè sivil san yo pa reflechi ak konsekans sa pral gen sou popilasyon an.
Se vre nou ta dwe repran kontwòl zòn yo, nou dwe kouri dèyè bandi k ap fè kadejak sou ti jèn fi yo epi mache kidnape moun. Se vre nou dwe pase Matisan san kè sote, pou chofè machin yo vwayaje san yo pa peye sanzave Vilaj Dedye ak Gran Ravin yo. Men nou pa dwe pote boure san reflechi tou, paske n ap viktim san pa gen rezilta. Mouvman yo dwe byen panse pou pa gen anpil viktim nan kan pèp la, jan sa te pase nan repons nou t ap eseye bay nan Kabarè ak Sous Matla.
Nou menm tou nan MAGHAITI nou pa kwè nan vyolans, nou kwè nan jistis sosyal, nou kwè nan yon etadedwa kote tout moun ap jwe wòl yo Kòmsadwa. Men tou nou p ap janm preche pou moun yo reziye yo al nan labatwa pou bandi kòche yo tankou bèt sovaj. Paske si te gen leta vre, si nou te gen dirijan ki responsab, depi aprè evenman Kanapevè a yo t ap pran kontwòl sitiyasyon an epi pran mezi pou bandi pa pran ti rès teritwa ki rete yo.
N ap di pèp la kontinye kanpe goumen, paske nou paka fè bak ankò. Akonpanye polisye yo, bay Lapolis bon jan enfòmasyon sou aktivite gang yo pou li ka aji. Pa al atake okenn gang poukont nou paske se nou menm k ap viktim an premye. Nou gen manchèt ak wòch men bandi yo gen gwo zam lagè nan men yo. Depoze telefòn yo lè n ap defann zòn nou, nou pa jounalis, nou p ap fè fim, se pa Hollywood nou ye men se rezistans k ap fèt. Aji ak anpil estrateji, pa kouri touye yon moun yo akize san prèv, epi veye pou menm gwoup moun k ap defann katye a pa tounen yon lòt gwoup gang demen.
Kanpe goumen l ye!
Atik sa se pwopriyete prive ©️ Gwoup Medya MAGHAITI 2023
