Pòtoprens jou ki te samdi 17 septanm 2022._ Semèn sa jwèt la gate nan men Ariel Henry ansanm ak akolit li yo, aprè yo te fin pran desizyon pou yo monte pri gazolin lan nan pri 570 goud, dyezèl 670 goud epi Kewozenn 665 goud.
N ap raple 10 desanm 2021 an, gouvènman defakto te deja monte pri gaz yo kote gazolin lan te 201 goud, li te pase ak 250 goud, dyezèl la 169 goud yo epi monte li ak 353 goud, yo te mete 189 goud anplis sou Kewozenn lan. Nan epòk sa minis planifikasyon an ki se Ricard Pierre ki sòti nan Sektè Demokratik ak Popilè a ki te di: ” Nou pran desizyon sa pou jwenn lajan pou yo konstrui lopital ak lekòl piblik, achte materyèl pou lapolis nasyonal la epi ede pèp la sòti nan mizè”. Ebyen 9 mwa aprè tout moun ka remake se te fab chwazi, paske bagay yo vin pirèd pou popilasyon an, kote mizè, grangou, ensekirite, lavi chè, chomaj, se sa yo k ap mennen.
Si pawòl la di yon moun k ap dirije dwe wè pilwen pase pwent nen li, mesyedam isit yo menm si yo wè danje a yo fonse tèt bese ladan l. Tout moun te gentan anonse si pri gaz yo monte ankò nan moman soufrans sa pral gen kouri, pral gen dechoukay ak leve kanpe toupatou nan peyi a. Ebyen an gwo ponyèt ak gwo zouzoun, ti granmou bab kanèl ki nan tèt primati a pa wè li pa tande li mete sou gaz la. Popilasyon an pa te pran tan pou l reyaji, bloke lari a epi sila ki nan grangou kòmanse dechouke depo ki gen manje ak kèk biznis ki sou chimen yo.
Anpil gwo vil nan peyi a leve kanpe depi 2 semèn pou bay gouvènman defakto a repons li merite. Malerezman se pa janm dirijan yo ki viktim dirèkteman atak yo, men pito sitirè nou rele boujwa yo ak moun ki fè pati klas mwayenn ki toujou sibi dechoukay ak zak kraze brize a. Anpil biznis kraze nan 2 semèn mobilizasyon sa yo, pèp la fache paske yo pran li pou ti bwa. Sa gen kèk mwa depi popilasyon an pa te reyaji, paske yo t ap sibi ensekirite ak lavi chè a nan silans yo ak reziyen. Ebyen van an vire, pitit Desalin yo ak Tousen yo mete pye yo atè.
Kisa gouvènman defakto sa itil popilasyon an? Repons lan se “Anyen, anyen menm”. N ap peye taks sou chak pwodui nou achte, menm yon sirèt nou peye leta jwenn ti komisyon pa li. Moun k ap travay nan leta tankou nan prive ap peye DGI yon dividal lajan chak mwa sou chèk yo, poutan yo pa benefisye anyen an retou kòm benefis. Okontrè se menm lajan taks Ministè Komès, DGI, APN, Imigrasyon k ap finanse koripsyon nan klas politik la, finanse gang ak alye li yo ak sèvi mwayen pou kraze tout fòm mobilizasyon kont yo. Finansman gaz la se sèl fòm benefis mas pèp la benefisye dirèkteman nan men dirijan isit ou, depi w koupe l swa ou rache manyòk ou oswa pèp vomi kòlè sou beton an. Ekwasyon an senp tankou bonjou!
Ariel Henry ak rès moun nan ekip li a di finansman gaz la koute leta 9 milya goud pa mwa, sa vle di yon sòm kòb ki 2 fwa plis pase lajan yo peye tout moun k ap travay nan leta. Men, kisa leta sa itil nou? Èske leta sa panse ak mas la k ap mouri ak grangou nan Site Solèy, Gran Ravin, Raboto, Lasalin ak lòt zòn defavorize yo? Èske leta sa ba nou manje? Èske nou kreye travay pou moun yo okipe fanmi yo? Èske pitit moun yo jwen lekòl gratis? Kòm san konsyans yo mete yon taks $1.50 sou chak transfè lajan k ap sòti lòtbò dlo epi yo di se pou pitit sòyèt al lekòl gratis, kot lekòl gratis sa yo?
Tout moun ka wè ak klè se moun ki gen plis mwayen yo k ap benefisye tout avantaj yo. Poutan, gen yon gwoup moun ki gen franchiz, sa vle di k ap antre anpil machandiz gratis nan peyi a epi k ap vann yo tèt nèg. Gen yon lòt gwoup moun ki gen benefis sou chak sak diri, chak ba fè, chak sak siman k ap antre nan peyi a.
Gen moun k ap benefisye anpil nan rakèt k ap fèt nan Leta yo, yo benefisye lajan, viza edityan, don k ap sòti nan entènasyonal la ak lèse pase nan tout bwat leta yo. Se sa moun yo rele eleman “sistèm” lan, yon fason pou yo pa site mo koripsyon ak koriptè. Se finansman moun sa yo pou gouvènman defakto a koupe pou li jwenn lajan pou li fè sosyal nan peyi a.
Pandan, semenn sa pèp souvren Site Solèy te pran lari a, paske gwoup gang G9 te ba yo chans pou yo pase. Kesyon pou kad nan gouvènman sa a ta dwe ap poze tèt yo: kijan moun sa yo fè ap viv toujou pou lamizè pa touye yo? Moun yo mèg, grangou make sou figi yo, y ap mache pye atè, yo san destinasyon, paske se kote ki gen manje y ap chache. Kòman w konprann yon moun ap kase yon magazen li kontan paske li jwenn 3 sachè bonbon oubyen moun lan pran yon kès kola cho? Pou nou sa tradui yon gwo kriz sosyal ak ekonomik. Depi ou trete yon moun tankou bèt ou pa dwe etone si li reyaji kou wè li.
Ann fè yon ti listwa: sou 2èm vèsyon Lavalas nan kòmansman lane 2000 yo, rejim sa te di l ap envesti nan moun, fè sosyal nan gwo geto tankou Site Solèy. Poutan, li pa te janm gen yon pwogram serye pou ede moun yo sòti nan kras vrèman, yo te pito chwazi yon mwayen pou yo sèvi ak yo pou konsève pouvwa nan ba yo zam ak lajan. Epòk sa Site Solèy te bay anpil gwo chèf gang tankou Amaral, Dread Wilmé, Labanyè, Kolibri… te gen yon baz nan chak 32 katye yo, epi chak baz sa yo te gen yon chèf ki t ap resevwa lajan nan kèk gwo bwat leta tankou Teleco ak ladwann. Se la koze gang lan pran pye nan peyi a.
20 lane aprè site a ap viv menm reyalite a, chak katye gen yon chèf epi youn ap goumen ak lòt. Poutan, rès popilasyon an ap kwoupe nan mizè. Jodia si moun sa yo pran lari pou yo kraze brize, nou dwe konprann sa k ap travèse yo epi nou dwe pran yo oserye paske yo pa gen anyen pou yo pèdi ankò, paske yo gentan pèdi sa ki pi enpòtan an ki se “anvi viv”, anvi pou yo gen yon demen miyò.
Yon lòt pwen, Ariel Henry te gen misyon pou li òganize eleksyon, se nan objektif sa ansyen prezidan Jovenel Moise te chwazi gras ak yon mesaj sou ”Twitter”. Dayè li pa gen okenn lejitimite popilè oubyen yon manda ki ba li yon objektif ak dat ekspirasyon li. Kòm ansyen anvwaye espesyal Daniel Foote di se ameriken k ap apiye PM defakto a, paske li te asepte yo depòte ayisyen ki te anba pon vil Texas yo, Ariel santi li se sèl wa. Antouka n ap suiv, n ap gade si dirijan yo ap ka danse konpa sa.
Jwèt la santi di! Oswa gaz la bese oswa nou tonbe nan gwo katchouboumbe nan peyi a!
Monte gaz la se youn, jwenn ponp pouki disponib pou vann li an se 2.
Bali gaz mesyedam!
Atik sa se pwopriyete prive ©️ Gwoup Medya MAGHAITI 2022
World
Discussion about this post