Depi kèk lane popilasyon an t ap rele chalbare dèyè polis nasyonal la, kote yo te toujou di polisye yo gen fòs sou manifestan k ap goumen pou lavi miyò, poutan yo kite bandi ap kalbende nan lari a. Anpil eskandal ak akizasyon sou do lapolis Nasyonal la, kote gen move grenn ki entegre nan enstitisyon an, relasyon polisye ak gang epi move konpòtman ajan yo konn genyen anfas pèp souvren.
Men, nou tout ka konstate dènyè tan sa yo gen anpil jefò ki rive fèt anndan polis nasyonal la menmsi nivo ensekirite a kontinye ap grenpe. Depi kèk jou nou remake gen yon ti souke kò k ap fèt kote lapolis la nan lide pou l reprann kontwòl peyi a nan men nèg ak zam ki achte l lajan kontan. Depi mwa mas pou rive jouk jounen jodia, lapolis sakaje anpil baz nèg ak zam, tankou 400 Mawozo ki nan Kwadèboukè, gang Vitelòm ki nan Tòsèl ak kèk lòt baz nan vil Okap. Anpil bandi bwè dlo dan yo, anpil lòt fouke tankou krab, anpil zam ak minisyon sezi.
Popilasyon an kòmanse santi travay yo epi li bat bravo pou souke kò sa.
Jou lendi 9 me ki sot pase a, direktè jeneral lapolis la “Frantz ELBÉ” te prezante bilan 6 premye mwa li sot pase nan tèt enstitisyon an. Selon li, bilan an pa twò mal ditou, kote plis pase 4 998 moun jwenn arestasyon yo pou vòl, kidnapin, vyòl, asasina epi zam ilegal.
94 prezime bandi tonbe nan echanj katouch ak polisye, lapolis sezi 234 zam, 21 machin, 20 moto, 1 bato, 658 kilo mayigwana, 25 kilo kokayin, 78 mil 520 dola ameriken epi 34 milyon 220 mil 575 goud. Se gwo koze, men sa pa kanpe la. Anplis, semèn sa ankò, kèk nan ti mesye bandi pye blanch yo jwenn anpil plezi nan men lapolis.
Malgre lapolis pat rive anpeche masak nan laplenn kil desak la, kote gang 400 mawozo te antre nan toke kòn ak gang Chen mechan nan baz li, lapolis la te rive mete bouch pou bay yon repons ak 2 machinn eskadron lanmò sa yo, jis pou moun laplenn yo te ka rale yon souf aprè 2 semèn batay.
Selon bilan sektè k ap defann dwa moun yo: “Plis pase 100 moun mouri, plis ke 10 mil lòt deplase kite kay yo, gen fanm ak tifi bandi te rive vyole epi gen anpil dega materyèl nan lagè sa“.
Sa pèp la dwe mete nan tèt yo: pa gen gwo bandi, pa gen ti bandi, pa gen bandi k ap defann ou, sèl solisyon an se kolabore ak lapolis pou n ka pwòpte katye nou ak move lawon sa yo.
10 me ki sot pase la, enstitisyon an mete anba kòd 2 polisye ki ta sanble se 2 gwo machann dwòg. Yo arete yon swadizan “DESIRE James” ak “JEAN LOUIS Fabert”, nan komin Lenbe anndan yon machinn nisann patwòl blan ak 352 kilo mayigwana epi 35 mil 985 goud, anplis yo te jwenn sou yo zam lapolis te bay yo pou pwoteje ak sèvi popilasyon an. Poutan, mesye yo te sanble plis anvi pwoteje sa k ap byen sèvi yo olye enstitisyon an. Ala desalmanaza nan repiblik la!
Pi gwo kou lapolis ta sanse fè pou mwa sa, se rive dejwe yon atanta kidnapin zago loraj gang 400 mawozo yo sou yon bis ki te chaje moun ki t ap sòti Sendomeng. Aksyon sa te pase jou kite 12 me 2022 an, nan komin Kwadèboukè a. Pandan, malfra yo te gentan pran kontwòl bis la epi te fè chofè a suiv yo jis rive nan ziltik, bandi yo t al tonbe sou yon bakòp lapolis ki simen bal sou yo, tankou grenn lapli. Kèk nan yo te rive tonbe sot nan machin lan epi kouri lage pye yo ak tout zam nan men yo. Sak te gen ti pantanlon nou ta ka rele eskini pa bò isit la oswa kolan pa te ka kouri, yo te ranpe tankou koulèv pou yo rantre nan twou yo.
12 me toujou, lapolis desann an gwo ponyèt nan komin Petyonvil, polisye yo sakaje kèk zòn, tankou Dyèg, Metivye, Doko pou derasinen bandi. Lapolis fè 5 bandi bwè dlo bouch yo nan toke kòn yo, yo arete 6 lòt moun ki sispèk, sezi 3 zam epi 2 machin.
Toujou nan menm jou sa, lapolis arete 9 moun ki sispèk nan fouy li t ap fè nan komin Sen rafayèl, pami yo, ki rele “Mastre Krick” ki ta yon grenn nan gang 400 Mawozo a ak rès yo ki se: Guinel Alcé, Prince Eddy, Frédéric Mionche, Davenson Blanc alias “Wewe”, Yvert Evens, Accile Phanel, Wolgen Dor, Davenson Blanc ke lapolis fouke paske yo te gen zam ak minisyon ilegal epi yo gen gwo akizasyon ki peze sou tèt yo.
Semèn sa tou, lapolis te byen fete nan baz chèf gang Vitèlom lan ki nan zòn Pènye. N ap raple tout moun, Viltelòm se te ansyen alye baz 400 mawozo epi bagay la vin gate.
Vandredi 13 me ki sot pase a, lapolis te antre nan Tòsèl, polisye yo ansèkle tout perimèt la epi simaye bal sou bandi. Polisye yo te debake ak gwo zam fann fwa, chablende, remoke pou ale ak machin yo epi gwo traktè pou kraze kay ki sèvi baz pou bandi yo.
Operasyon sa se wololoy, se la nou aprann bandi konn kouri pi mal pase atlèt jamayiken “Usain Bolt”. Pawòl la pale, depi jou operasyon an Vitèlom gen yon dyare ki pa janm kanpe, men li p ap kite sanwont, paske li menm ak rès ekip li yo gentan ap frape nan lòt zòn ki toupre a jodi samdi 14 me a.
Pandan evenman sa yo, pouryanis ki rele Ariel Henry ki se santans Jovnèl mouri ki te pou nou an, chita 2 pye li anlè, tèt li sou zòrye li, l ap souse manmèl peyi a ak tout zanmitay PHTK li yo. Omwen li te ka eseye fe yon jefò pou byen ekipe polisye yo, achte chablende, ba yo plis zam ak minisyon pou defèt bandi.
Non! se pa sa ki nan tèt granmoun lan, dayè li pa te rele nou, se nou ki al dekwoke yon doktè nan klinik li pou nou ba l dirije yon peyi frajil konsa.
Malgre tout rezilta sa yo, Frantz Elbe pa bezwen kouri bat lestomak li, paske gang yo anpil epi moun k ap founi yo zam ak minisyon yo toujou la.
Lapolis dwe travay nan tèt kole ak lajistis pou mare ni bandi pye blanch ni bandi ak kravat. Men, popilasyon an kòmanse santi travay yo, nou kòmanse santi sèvis espyonaj lapolis la ap mache epi popilasyon bay ti kout dwèt pa li tou nan travay sa.
Jan yon zanmi ekri sou Facebook: “chak lè lapolis la frennen yon bandi, nou bwè yon byè pou fete viktwa sa, semèn sa yo nou toujou al dòmi sou”.
© Tous droits réservés – Groupe Média MAGHAITI 2022
