Nan yon kominike Ministè Edikasyon Nasyonal ak Fòmasyon Pwofesyonèl (MENFP) sòti ayè mèkredi 10 avril 2024 la, li eksprime solidarite l ak tout moun presizeman paran yo, pwofesè epi direktè lekòl yo. Li konsyan yo poko ka rekòmanse nan aktivite lekòl nan depatman Lwès ak Latibonit alòske majorite lekòl ki nan lòt depatman yo kontinye ap fonksyone.
«MENFP bay Asirans ak tout ajan edikatif yo, espesyalman direktè lekòl yo ak paran yo, l ap pran tout dispozisyon ki nesesè pou penmèt Sant Pèmanan Evalyasyon an òganize egzamen leta yo nan zòn ki ta gen difikilte yo tankou kèk komin nan depatman Lwès la ak Latibonit», se sa Ministè Edikasyon an eksplike nan kominike sa a.
Pandanstan, ministè levasyon an ap ankouraje tout jefò k ap fèt nan peyi a pou penmèt lekòl la reprann nan tout rakwen nan peyi a nan enterè timoun yo. MENFP ap salye tout direktè ki pa sispann travay pou fasilite timoun yo kontinye ak aprantisaj yo.
Sitiyasyon ensekirite ak enstabilite a gentan fèmen divès pòt lekòl nan zòn Pòtoprens, akoz bandi ak zam pa sispann simen latwoublay ak laperèz. Epi plizyè lòt lekòl sibi dechoukay, genyen yo boule rapyetè, anplis gen lòt ki tounen kan refijye pou anpil moun ki te kouri kite kay yo.
Ministè Edikasyon Nasyonal ak Fòmasyon Pwofesyonèl (MENFP) ap raple piblik la sitou ajan edikatif yo : «Sant Pèmanan Evalyasyon ki se yon antite anndan ministè a gen responsabilite pwopoze, kwòdone epi òganize evalyasyon sou tout tèritwa peyi d Ayiti, jan sa di nan Atik 1.4 ak 13 nan arete ministeryèl ki te kreye sant sa a nan dat 2 jen 2022». Li menm ajoute pou li di rete tèt frèt, okenn Kandida regilye p ap rete deyò. Li deja pran tout dispozisyon pou sant pèmanan evalyasyon an jwe wòl li kòmsadwa nan tèt kole ak biwo Nasyonal egzamen leta a. Y ap prepare egzamen leta pou kote sa pa ta rive fèt jan sa prevwa nan finisman mwa jiyè ak kòmansman mwa dawout la, daprè nouvo kaladriye reyemenaje a.
Pandan chak jou plis Krim ap fèt anndan peyi a, sitou nan zòn Pòtoprens ak depatman Latibonit, Ministè Edikasyon Nasyonal pa chwazi kanpe sou fòmasyon akademik timoun yo.
«Ministè a bay garanti l ap akonpanye tout Kandida yo pou reyisit yo nan òganizasyon kou konpansasyon aprantisaj ak tout lòt sipò pou ede kandida yo byen prepare egzamen yo», se sa a MENFP kontinye pou l di.
Pou fini, ministè levasyon an raple se devwa tout sitwayen ak tout aktè pou pwoteje edikasyon ak lekòl nan enterè timoun yo. Pou li, pa gen avni san edikasyon, pa gen edikasyon san lekòl. Kidonk, se nou tout ki pou mete men pou pwoteje dwa fondamantal timoun yo pou yo ale lekòl nan kèlkeswa sikonstans lan.
Atik sa se pwopriyete prive ©️ Gwoup Medya MAGHAITI 2023
