Sitiyasyon enstabilite ak ensekirite a lakoz 900 lekòl oblije fèmen pòt yo pou bout mwa janvye selon Fon Nasyonzini pou Timoun (UNICEF). Yo eksplike sa a atravè yon nòt òganizasyon Nasyonzini (ONU) pibliye nan dat ki te 8 avril 2024 la.
Plis pase 200000 timoun pa gen aksè ak edikasyon akoz menas lanmò gang, vyolans bandi ak zam k ap pèsiste nan Pòtoprens ak Latibonit, presizeman gwoup gang “Viv Ansanm”.
N ap raple n, bandi te mennen yo gwo atak sou penitansye Nasyonal ak prizon kwadèboukè a sòti 3 ak 5 mas ki sot pase la, sa a ki lakòz anviwon 4500 prizonye sove nan prizon nan peyi a.
Selon UNICEF : «Divès espas ki te rezève pou timoun yo transfòme kòm teren batay ant Lapolis ak bandi chak jou, jiskaske bandi rive privatize yo epi simen laperèz sou popilasyon an nan espas yo osnon divès sal klas ki konvèti an abri pou loje moun pou yon ti bout tan».
Toujou selon UNICEF, pou mwa mas la, vyolans yo lakoz omwen 362000 moun deplase ale kwense kò yo nan yon espas piblik oubyen prive pou yon ti tan, presizeman anndan lekòl yo.
Pandan chak sal klas transfòme kòm espas pou kèk fanmi abrite yo pandan yon ti tan. Teren lekòl timoun yo konn jwe yo gen tant sou yo. Menm jimnazyòm Vensan transfòme an sant pou resevwa moun k ap kouri pou ensekirite bò lakay yo.
«Anpil lekòl pa gen aksè pou fonksyone kounye a akoz vyolans ak ensekirite pa sispann grandi touprè yo», se sa a reprezantan UNICEF an Ayiti a, Bruno Maes, deklare. Li kontinye pou l di se paske kèk ladan yo okipe avèk moun ki deplase epi lòt anba men gwoup gang ki deja piye ak vòlè bagay ki te ladan yo.
Sou lòtbò, yon gwoup bandi ak zam te rantre nan yon lekòl (Collège Frère Nau) pou mete dife ladan l nan dat 25 mas ki sot pase la nan sant vil peyi a.
UNICEF koube l byen ba pou l mande tout pati ki konsène yo pou pwoteje élèv yo, pwofesè yo, paran yo epi batiman lekòl yo. Yo dwe fè sa a akoz Ayiti pami 119 peyi ki te siyen yon angajman politik sou koze sekrite nan lekòl. Yo dwe fè yon fason pou pwoteje espas yo kont tout konfli nèg ak zam.
Malgre malè pandye sa yo, paran yo toujou montre volonte yo pou voye pitit yo lekòl paske pou anpil fanmi an Ayiti lekòl se kè yo. Yo bay sa a anpil enpòtans ak valè, selon sa a Bruno Maes, reprezantan UNICEF an Ayiti, ajoute.
Pou fini, bandi ak zam toujou pran teritwa yo epi pò yo. Yo menm kontinye ap kontwole, chak jou, kapital peyi a epi menm menase timoun ki pral lekòl yo kote plizyè timoun pa sispann fè fas ak kadav k ap twomatize yo.
Atik sa se pwopriyete prive ©️ Gwoup Medya MAGHAITI 2023
