Jij Merlan Belabre te tande ansyen senatè Latibonit la, Garcia Delva yè jedi 9 me 2024 la. Ansyen palmantè a te ale devan jij la akòz akizasyon li gen sou do l nan kad dosye koripsyon Inite Lit Kont Koripsyon (ULCC) te jwenn ki genyen nan chanm Sena a.
Aprè jij enstriksyon Merlan Belabre k ap mennen dosye sa te fin fè arete epi libere sekretè jeneral Sena a, Marie Nelly Verpile Boyer sou 8 jou, ansyen senatè Garcia Delva sou lòtbò pa li, te reponn avèk envitasyon jij la. Puiske ankèt ULCC a te di ansyen palmantè a gen 5 machin ki nan men l li pa janm remèt menm aprè manda li fini an.
15 novanm 2023, Inite Lit Kont Koripsyon te transfere atravè yon dokiman non plizyè ansyen palmantè ki enplike nan dosye sa. Hervé Lénine Fourcand, Garcia Delva, Joseph Lambert, Wanique Pierre, Francisco Delacruz, Willot Joseph, Worms Périlus, Clovis Obas, Wolf Papillon, ak François Malherbe se non sitwayen sa yo enstans la te mande pou lajistis pousib yo pou koripsyon sila.
N ap soulinye, ògan etatik sa ki gen pou misyon konbat koripsyon ak pwoteje administrasyon epi byen piblik yo te mande pou yo mete aksyon piblik an mouvman kont moun sa yo, akòz 13 machin leta yo pa remèt pandan manda yo a. Desizyon sa pran menm jan atik 5.4 lwa 12 mas prevansyon ak sanksyon kont koripsyon di l la.
Atik sa se pwopriyete prive ©️ Gwoup Medya MAGHAITI 2024
