Pandan non l te deja site nan koripsyon nan dosye pil lajan li te depanse pou achte yon grenn kay pou ONA, ajan Inite Lit Kont Koripsyon (ULCC) yo fè konnen ansyen direktè adjwen ONA a, Jemley Marc Jean Baptiste gen men l tranpe tou nan zafè machin ki konn lwe pou enstitisyon an. Se pou sa, yon lòt fwa ankò yo mande pou lajistis arete l pou detounman byen piblik, abi fonksyon, ak pwofitè.
Nan yon premye tan, ULCC di konsa, sòti 7 jen 2021 pou rive 10 fevriye 2023, Jemley Marc Jean Baptiste depanse antou 61 294 823.24 goud sèlman pou te lwe machin pou enstitisyon an. Poutan, anketè yo soulinye nan tout kontra ki te siyen pou machin sa yo pa gen youn nan yo ki te janm respekte règ ki etabli pou sa te fèt yo.
Konsa, sòti oktòb 2021 pou rive septanm 2022, anketè yo fè konnen ONA te siyen kontra pou sèlman 40 009 400.00 goud, tandiske nan menm peryòd la ansyen direktè a te fè debloke 46 252 230,45 goud yon lajan ki depase tarif Komisyon Nasyonal Mache Piblik yo(CNMP) fikse. Malgre tout kontra Jean Baptiste te siyen yo ak tout lajan li te fè debloke pou kontra sa yo, ajan ULCC yo fè konnen Kou Siperyè Dèkont (CSCCA) pa t janm aprouve youn nan kontra sa yo.
Yon lòt kote, ULCC presize gen nan machin yo se pa pou antrepriz lokasyon yo ye vre. Nan sans sa, yo site yon Toyota Prado blende ki lwe nan men konpayi Eben-Ezer Rent-a-Car poutan ki sou non Roody Trézil, yo te lwe tou yon Mazda BT50 nan men VP Armored Service Rent a Car poutan se yon machin ki pou antrepriz First Step Car Rental. Pou 2 machin sa yo, anketè yo di ansyen direktè a te debloke 22 855 800.00 goud, san l pa t peye okenn taks nan Direksyon Jeneral Enpo(DGI).
Nan sa ki konsène pwòp enterè ansyen fonksyonè leta a, ULCC lonje dwèt sou li dèske l ta itilize pozisyon l pou te benefisye yon machin Toyota Land cruiser modèl 2021 blende nan nivo 6(B6) ki te koute leta ayisyen 160 000 dola ameriken. Yo presize Jean Baptiste te pwofite pran machin sa nan kad pwogram “Car Plan” pandan se li ki te responsab tout resous ONA yo, poutan yo di li pa t janm kalifye pou pwogram sa. “Car Plan” se yon pwogram machin ONA te mete sou pye pou bay direktè teknik yo kòm te gen pwoblèm machin nan enstitisyon an pandan peryòd sa.
“Nan operasyon sa li te chwazi pwoteje pwòp enterè l olye l te pwoteje pa enstitisyon an kote l pran enterè ilegal. Se yon enfraksyon lalwa 12 mas 2014 la kondane nan atik 5.13. Pandantan sa, anketè ULCC yo dekouvri li te fè direktris jeneral adjwen li an, Stéphanie Mondestin ak direktè kabinè l la, Roseman Aspilaire benefisye 2 machin ki koute 17 516 000.00 goud nan kad menm pwogram sa”, daprè detay rapò a bay.
Sou plan administratif, ULCC mande pou Kou Siperyè Dèkont chache jwenn tout dokiman ki enplike Jemley Marc Jean Baptiste nan tèt ONA, epi mande pou responsab yo jwenn tout dosye ki gen rapò ak kantite lajan ki pèdi nan pwogram sa yo. Sou plan penal, Inite lit Kont Koripsyon mande mete aksyon piblik mete an mouvman kont Jemley Jean Baptiste pou tout zak li komèt nan tèt Ofis Nasyonal Asirans-Vyeyès la menm jan lalwa 12 mas 2014 la kondane koripsyon nan atik 5.4, 5.5, 5.12, ak 5.13 la.
Atik sa se pwopriyete prive ©️ Gwoup Medya MAGHAITI 2023
