Nan lide pou te mete limyè sou yon kay ki trouve l nan Ri Lama, Petyonvil, ansyen direktè adjwen Ofis Nasyonal Asirans-Vyeyès(ONA) la, Jemley Marc Jean Baptiste te achte nan men ansyen Depite Alfredo Junior Antoine, ULCC fè konnen gen gwo magouy ak koripsyon ki te fèt nan dosye sa. Se pou sa, yo mande pou lajistis mare 2 moun sa yo ak tout lòt moun ki te enplike nan resevwa nan 86 383 053.93 goud ONA te peye pou kay sa.
Selon premye enfòmasyon UlCC bay yo, nouvo batiman yo te achte nan kad pou mete sou pye yon lekòl fòmasyon nan ONA, e depi nan kòmansman pwosesis pou te achte l yo anketè yo di te gentan kòmanse gen koripsyon. Puiske, yo fè konprann non sèlman ansyen direktè adjwen an pa t fè pwosesis li te dwe fè yo pou te achte kay sa, men tou papye ki te dwe siyen aprè 4 novanm 2021(dat palmantè a te ofri kay la), te gentan siyen depi nan dat 28 oktòb 2021. Yon aksyon selon anketè yo, ki montre aklè se yon zafè ki te gentan finn siyen depi avan menm mesye Jean Baptiste te sonje fè pwosesis legal yo.
Se konsa yo revele, 27 desanm 2021, Bank Nasyonal Dayiti (BRH) te swadizan resevwa lòd nan men Direktè jeneral ONA a, pou yo te transfere 86 383 053.93 goud sou kont notè a ki se Daniel Despeignes nan Capital Bank. Men, anketè yo presize tousuit aprè kòb sa finn depoze sou kont notè a gen 96% nan lajan an ki al jwenn 4 antrepriz sou kont bankè yo. ULCC di, divès tranzaksyon sa yo te fèt sòti 30 desanm 2021 pou rive 10 janvye 2022.
Premye antrepriz la se Archi-Immo li te resevwa 35 382 585.00 goud se ansyen palmantè Alfredo Junior Antoine ki responsab li, 2yèm nan se Idéal Estate Innovation li te resevwa 15 000 000.00 goud se Piterson Juste ki responsab li. 3yèm antrepriz la li menm gen 2 moun ki reprezante l se Piterson Juste toujou ak Stéphanie Mondestin yo menm yo te resevwa 15 218 000.00, dènye a se A&C Fournitures de Bureau et Matériels Informatiques ki gen nan tèt li Christelle Lhérisson li te jwenn 18 140 758.00 goud.
Pou ka pa Stéphanie Mondestin, ULCC fè kwè li pa t sèlman pran lajan sou non antrepriz li a, men yo di konsa li te fè plis kòb toujou puiske se li k te direktris jeneral adjwen a.i nan ONA, kidonk, pozisyon l te pèmèt li jwenn yon enterè dirèk nan achte kay la. Anketè yo soulinye tou, madanm sa te resevwa antou 30 381 965.00 goud sou toulède kont bankè li genyen nan Sogebank ak nan Bank Nasyonal Kredi(BNC), kòb sa toujou sòti nan lajan ONA te peye kay la.
Ansyen depite Alfredo Antoine li menm, yo akize l kòm moun ki te nan konivans ak Madanm Mondestin, puiske nan dat ki te 14 janvye 2022 a, ULCC di li te depoze 15 163 965.00 goud sou kont antrepriz Ideal Estate Innovation, ki se pwopriyete madanm nan. Li te fè tranzaksyon sa yon jou aprè l te finn resevwa 15 milyon goud nan men antrepriz A&C a. Epi yo prezante l kòm yon gwo magouyè dèske l te itilize yon mwayen pou l pa t resevwa yon goud nan lajan kay la sou kont pèsonèl li, tandiske li t ap blanchi lajan anba anba akòz antrepriz sa yo, ki selon ankèt la pa menm egziste.
Pou sa ki konsène Piterson Juste, yo lonje dwèt sou li kòm moun ki te fè transfè lajan an sou kont antrepriz Ideal Estate Innovation an. Nan fason sa, yo eseye jistifye pou di, se paske l pa t vle pou non madanm Mondestin parèt nan dosye lajan sa ki fè l te aji konsa li menm, kidonk yo akize l kòm konplis nan koze blanchiman pwodui krim nan.
Pou kounya, malgre ONA te finn peye depi 27 desanm 2021 an, yon sèl kou 86 383 053.93 goud pou kay sa, ajan ULCC yo di ONA poko janm gen aksè ak pwopriyete sa toujou. Okontrè yo fè tout moun konnen, ansyen depite Antoine toujou kontinye ap fè lajan nan lwe kay sa, malgre batiman an se byen prive ONA li ye jounen jodi a.
Se nan sans sa ULCC mande sou plan administratif pou Kou Siperyè Dèkont(CSCCA) fè kou yo konnen pou jwenn diplis sou tout dega ansyen direktè adjwen ONA a, Jemley Marc Jean Baptiste te fè. Yon lòt kote, yo mande pou ONA chache mwayen pou pran kay sa yo te peye plizyè milyon goud pou li a prese prese.
Sou plan penal Inite lit Kont Koripsyon (ULCC) mande pou lajistis aji kont tout moun ki enplike nan dosye sa.
“Nou mande pou aksyon piblik mete an mouvman kont Jemley Marc Jean Baptiste pou abi fonksyon l fè menm jan atik 5.5 lalwa 12 mas 2014 la te gentan di l la. Menm bagay la dwe fèt pou Stéphanie Mondestin pou enterè ilegal li pran nan dosye a, pou blanchiman pwodui krim nan epi pou asosiyasyon malfektè Yon bann bagay atik 5.3, 5.13 lalwa nou sot site la yo kondane menm jan atik 224, 225 kòd penal la kondane yo tou. Alfredo Junior Antoine li menm antanke youn nan moun ki nan tèt blanchiman pwodui krim nan, Piterson Juste se pou konplisite l nan menm bagay sa yo atik 224, 225, 44, 45 kòd penal la ak tout atik 5.3 lalwa 12 mas 2014 la, kondane bagay sa”
Atik sa se pwopriyete prive ©️ Gwoup Medya MAGHAITI 2023