Nan kad ankèt k ap mennen sou zak asasinay ansyen prezidan ayisyen Jovenel Moïse la, Mario Antonio Palacios ki se youn nan akize yo plede koupab jounen jodi vandredi 22 desanm 2023 a. Selon Miami Herald ki site pwokirè federal Andrea Goldbarg ak Monica Castro akize a se vre te bay materyèl men li pa te jwe yon twò gwo wòl nan zak ki te pase a.
Alòske l te fè konnen li pa te janm gen men l tranpe nan touye pyès prezidan nan ane 2021, jounen jodi a ansyen sòlda kolonbyen an, Mario Antonio Palacios resi deklare li koupab nan lanmò Jovenel Moïse la. Men, daprè sa jounal Ameriken an rapòte jan lòt akize yo enplike byen fon nan dosye a, se pa konsa Palacios ta enplike li menm.
“Palacio te jwe yon ti wòl, paske li pa te enplike nan koze pran desizyon estratejik konsènan konplo asasinay la“, toujou daprè sa jounal la di, pandan li soulinye ansyen sòlda kolonbyen an la pou li jwenn santans li premye mas 2024.
Nan moman jijman kolonbyen an, pwokirè Goldbarg te li deklarasyon Palacios te fè otorite jidisyè Ameriken yo, kote l prezante l tankou yon sòlda sekirite anliy ki te jis ap resevwa lòd nan men Alejandro Rivera Garcia, ki li menm kondane pou l pase tan l nan prizon. Li di tou, Palacios pa te gen otorite ni pou l te pran desizyon ni pou l te patisipe nan pyès reyinyon operasyon ki t ap fèt nan mitan lòt mesye yo.
Yon lòt kote, pwokirè a mansyone akize a te vòlò yon pati nan lajan ak bijou yo te jwenn lakay prezidan an. fas ak akizasyon sa yo, jounal la fè konnen Mario Antonio Palacios pa t pran tan pou l te reponn pou di wi ak tout sa lajistis Ameriken rive repwoche l yo.
Annatandan jij José Martinez bay desizyon li, avoka Palacios la, ki se Alfredo Izaguirre fè kwè li posib pou kliyan li a pa kondane pou l pase tout rès lavi l nan prizon, lè l konsidere jan li kolabore ak lajistis Ameriken ak nivo enplikasyon l tou. Se pou sa, li di konsa li pral mande pou jij la pran pitye pou li yon fason pou kliyan li a ta pase mwens tan nan prizon.
Atik sa se pwopriyete prive ©️ Gwoup Medya MAGHAITI 2023
