Nan kad ankèt sou lanmò ansyen prezidan Jovenel Moïse la, Joseph Vincent ki se youn nan 11 akize ki nan prizon Etazini, plede koupab jodi madi 5 desanm 2023 a. Daprè Miami Herald ki rapòte yon deklarasyon akize a, Joseph Vincent resi deklare li te youn nan moun ki te nan fè konplo pou touye ansyen chèf leta a.
“Vincent, ki gen 58 lane admèt li te rankontre an Ayiti yon gwoup konspiratè nan lannuit avan lanmò prezidan Jovenel Moïse 7 jiyè 2021 an. Se li menm tou ki te prezante tèt li kòm yon reprezantan Depatman Leta Ameriken bò kote akolit ayisyen l yo“, se sa jounal ameriken an fè konprann pandan yo soulinye li te patisipe nan yon plan ki te vize pouse moun pran lari pou manifeste kont Jovenel Moïse, yon aksyon ki t ap pèmèt yo gen yon pi bon pretèks pou te fòse dirijan ayisyen an kite pouvwa a.
Pi lwen, Miami Herald di konsa prizonye a rive plede koupab tout bon vre se nan moman jij ameriken an, José Martinez te poze l kesyon an. Konsa, avèk konfimasyon sa li rive rekonèt li te patisipe nan lanmò prezidan Moïse. Yo di tou, Vincent riske pran prizon pou tout rès vi li nan odyans l ap genyen 9 fevriye 2024.
Pou kounya, Joseph Vincent se 4yèm pèsonalite aprè Jhon Joël Joseph, Rodolphe jarr, ak Alexandro Rivera Garcia ki rive plede koupab nan kad dosye sila.
Atik sa se pwopriyete prive ©️ Gwoup Medya MAGHAITI 2023
