Anviwon yon mwa aprè gwo dife te pran nan pi gwo rezèv byosfè nou an, minis anviwonman an James Cadet anonse ayè lendi 20 mas la dife yo etèn. Pandantan sa li fè konnen nan Pik Makaya sèlman se anviwon 307.7 ekta tè ki pase anba flanm dife.
Menm jan Ajans Nasyonal lè Pwoteje yo (ANAP) te akize kèk sitwayen ki ta mete dife nan Pik Makaya ak forèdèpen an, se menm pawòl sa yo tou minis Cadet deklare pandan l te pwofite bay yon bilan ki depase 119 ekta tè responsab Fondasyon Rebwazman ak Ledikasyon Jean Robert Sultan te bay nan premye konsta ki te fèt yo.
“Nou gen anviwon 307.7 ekta tè ki boule, anviwon 285 ki anndan pik Makaya a ki boule, nou genyen anviwon 25 ki deyò forè a ki boule. Jeneralman se yon fenomèn dorijin entwopik se lòm ki koz li, se vre gen orijin natirèl pou ensandi forè yo men ka sa se lòm ki a orijin li“, se deklarasyon minis lan.
Daprè detay chèf anviwonman an bay sou tout kote dife a te pran nan forè yo, li prezise dife a te etann li sou 4 depatman, 4 komin, 14 seksyon kominal. Li site fwaye dife a te nan plizyè zòn tankou Kanperen, Dichiti, Pestèl, Bomon, ak Wozo.
Nan menm sans sa, minis Cadet afime gen moun ki itilize nan tè forè a pou plante pou zafè pèsonèl yo, e l rive menm di gen moun ki menm rete anndan espas forè a, kote gen estrikti ki egziste tankou mache piblik anndan forè a.
Yon lòt kote, li fè konnen se tout yon ekip ki te mobilize pou te etèn dife sila ki rive fè gwo dega akòz reta ki te gen nan entèvansyon yo. Men li di tou y ap pran dispozisyon pou kwape tout move zak sa yo ki menase lavi forè nou yo.
“N ap rete dinamik pou ti rès forè nou rete a pa pase anba dife. Gouvènman an avè mwen n ap goumen pou kanpe emoraji a, pandan n ap pran dispozisyon pou mete ajan pou netwaye forè a pou pèmèt li respire, nou bezwen kèk teknisyen kòm ajan ki fòme ki ka pare dife pou demen nou rive mete ti rezo anti dife nan Pak sa yo ki trè sansib paske se vrèman patrimwan nasyonal ak mondyal nou yo ye”, toujou daprè sa minis James Cadet deklare.
Photo: Haitinews2000
Atik sa se pwopriyete prive ©️ Gwoup Medya MAGHAITI 2023
