Nan kad lit y ap mennen pou pwoteksyon dwa moun nan mond lan, Depatman trezò ameriken sanskyone jodi vandredi 8 desanm 2023 a, 4 prezime chèf gang nan peyi a. Jhonson André alyas Izo, Renel Destina alyas Ti lapli, Vitelhomme Innocent, ak Wilson Joseph se moun sa yo otorite ameriken yo prezante kòm pi gwo menas pou ayisyen k ap viv nan peyi a.
Selon Ofis Kontwòl byen Etranje(OFAC) chèf gang sa yo k ap dirije gwoup 5 segon, Gran Ravin, Kraze baryè, ak 400 Mawozo, se moun ki enplike nan divès zak tankou ansasinay, kidnapin, moun ki gen fo zam, detounman machandiz, asosiyasyon malfektè, ak vyolans seksyèl. Dayè yo site non Izo kòm moun ki enplike nan vyole anviwon 1 035 moun sèlman pou ane 2022 a.
“Moun ki sòti anba grif nèg sa yo idantifye André ak tout akolit li yo kòm moun ki dirèkteman responsab 1 035 ka vyolans seksyèl nou anrejistre sèlman pou lane 2022 a. Destina li menm, se alye enpòtan André li menm li kidnape, li touye, li vyole, li kraze vòlè epi mete dife nan kay moun, e li kontinye fè atak sou polisye ayisyen”, selon detay ki bay nan dokiman an.
Yo kontinye pou di ministè ameriken pou lajistis (DOJ) te foure non Innocent ak Joseph nan lis yo tou pou wòl yo jwe nan kidnapin ak zam nan men yo te fè sou sitwayen ameriken nan peyi a. Fas ak tout akizasyon sa yo, Depatman trezò ameriken an rive sanksyone epi deklare 4 endividi sa yo se moun ki fè dwa moun paka respekte nan peyi Dayiti.
“Non yo chak la site kòm pèsonalite etranje ki responsab oubyen ki konplis nan vyolasyon grav dwa moun, oubyen ki enplike yon ti kras oubyen dirèkteman”, Daprè responsab yo ki soulinye mezi sanksyon sa yo pran se gras ak dekrè EO 13818.
N ap soulinye, sanksyon sa yo pran se nan kad selebrasyon 75yèm anivèsè Deklarasyon Inivèsèl Dwa Moun k ap fèt 10 desanm k ap vini la. Se sa k fè, sekretè nan Trezò a, Janet Yellen mansyone mezi sa yo la pou montre nivo angajman yo genyen pou yo konbat tout moun ki responsab twoub sa yo, puiske li di kèlkeswa kote zak sa yo fèt nan mond la, se imanite yo ak konsyans kolektif yo ki frape.
Atik sa se pwopriyete prive ©️ Gwoup Medya MAGHAITI 2023
