Nan yon kominike yo sòti jodi lendi 11 desanm 2023 a, depatman deta Ameriken anonse yo sanksyone ansyen premye minis Jean Max Bellerive ak ansyen senatè Nenel Cassy epi Hervé Fourcand.
Anplis, responsab ameriken yo sanksyone tou plizyè manm nan fanmi ansyen fonksyonè leta sa yo.
Aprè depatman trezò Ameriken te fin sanksyone 4 chèf gang 8 desanm pase a, jodi a depatman Ameriken li menm pran menm desizyon sa yo pou ansyen chèf gouvènman, Jean Max Bellerive ak 2 ansyen senatè ki se Nenel Cassy epi Hervé Fourcand.
Menm jan pou 3 pèsonalite yo, depatman deta Ameriken fè konnen li sanksyone ansyen premye minis Jean Max Bellerive akoz li te itilize pozisyon l pou te fè koripsyon pi byen nan leta a. Nan menm sans sa, otorite Ameriken yo rive pran menm mezi sanksyon sila yo kont madanm ansyen chèf gouvènman an, Myriam Estevez De Bellerive ak 2 pitit fi li yo : Diana Jennifer epi Jessica Bellerive.
Se nan menm kad dosye sa tou, responsab yo rive pran sanksyon kont madanm Nenel Cassy ki se Katterine Cassy Chery ak yon timoun, yo pa bay pyès detay sou li.
“Nou deside di non Bellerive, Cassy, Fourcand pou tout moun konnen e nou fè sa menm jan atik 7031(c) la di l. Yo te itilize pozisyon piblik yo pou te patisipe nan divès aktivite ki pa bon pou gouvènman Ayisyen an“, se sa yo ekri pou chak grenn pèsonalite yo pran desizyon sa kont yo jodi a.
Atik sa se pwopriyete prive ©️ Gwoup Medya MAGHAITI 2023
