Polis Nasyonal Dayiti mande pou jij k ap kondui dosye kagezon zam ak minisyon ilegal 14 jiyè 2022 a sou responsabilite legliz Episkopal Dayiti, mete yon manda dèyè ansyen minis Jistis Berto Dorcé jounen jedi 6 avril 2023 a.
Ansyen Minis Jistis ak Sekirite Piblik (MJSP) Berto Dorcé, akize nan dosye kagezon zam ak minisyon ilegal legliz Episkopal Dayiti, kòm moun ki ta itilize trafik enfliyans ak nan asosyasyon malfektè epi ansanm avèk plizyè lòt chèf nan depatman Nòdwès la, sitou ansyen Komisè gouvènman Michelet Virgile, selon sa medya Le Nouvelliste rapòte apati sous Direksyon Santral Polis Jidisyè.
Anketè Biwo Afè Finans ak Ekonomik (BAFE) di li rete kwè « Ansyen Minis Jistis la te konnen kibò bato zam ak minisyon ilegal « Miss Lily» te prale» toujou selon medya Le Nouvelliste.
Alòske anketè yo rive jwenn apèl telefòn ant Mèt Berto Dorcé ak mèt Michelet Virgile anvan, pandan epi aprè bato « Miss Lily» te rive , aprè yo te fin libere yon sispèk nan dat 6 jiyè lane dènyè, nan komisarya Pòdpè a.
Plizyè ansyen fonksyonè nan leta ap chèche nan kad dosye sa, sitou ansyen Minis Jistis ak Sekirite Piblik la, Berto Dorcé. Anketè BAFE kontinye pou yo di: « Ansyen minis Jistis defakto Berto Dorcé te remake nan Primati 8 kiyè 2022 a, ansanm avèk ansyen Direktè ki te responsab direksyon afè jiridik Ministè Jistis, Fritz Haubourg, poutan non li te site nan liberasyon Jonas Georges ak Fritz Jean Rélus ki te gen non li site nan dosye sa », pou ajoute medya n site a.
N ap raple ansyen sekretè jeneral bawo Pòtoprens lan Mèt Robinson Pierre Louis ki te ansyen manm nan kabinè ansyen minis Berto Dorcé, te arete nan dat 22 Jiyè 2022, aprè yon odisyon nan Direksyon Santral Polis Jidisyè (DCPJ). Mèt Robinson Pierre Louis ta avwe li te itilize enfliyans li pou libere Fritz Jean Relus ak Jonas Georges ki te arete nan kad dosye sa.
Atik sa se pwopriyete prive ©️ Gwoup Medya MAGHAITI 2023
