Nan kad ankèt Direksyon Santral Polis Jidisyè (DCPJ)a ap mennen sou masak ki te fèt nan zòn Kanaran samedi ki te 26 dawout la, responsab yo konvoke Pastè Marco ak kèk kolaboratè l pou vinn reponn kesyon lajistis demen vandredi premye septanm 2023 a.
Aprè lidè relijye a pa t reponn ak envitasyon komisè gouvènman Kwadèboukè a, Roosevelt Zamor te fè l lendi pase a, jodi jedi a DCPJ nan tèt kole ak Biwo Zafè Kriminèl (BAC) envite Pastè legliz Pisin Bethesda a pou al reponn kesyon douvan lajistis peyi a.
“Direksyon Santral Polis Jidisyè a mande w pou ou menm ak tout kolaboratè w oubyen ouvriye w prezante nou nan biwo BAC la, vandredi premye septanm k ap vini la“, se sa responsab yo fè konnen nan lèt envitasyon yo voye pou Pastè Marcorel Zidor a.
N ap raple, avoka pastè a te ekri komisè gouvènman Kwadèboukè a nan lide pou responsab la ta mete pou yo lòt dat konvokasyon an. Selon deklarasyon komisè a te fè sou Radyo Mega, avoka bèje legliz Pisin Bethesda a te di se akòz li te blese nan mach ki te bout ak masak sou fidèl li yo nan zòn Kanaran an, ki fè l pa t ka prezante l douvan chèf gouvènman an.
Atik sa se pwopriyete prive ©️ Gwoup Medya MAGHAITI 2023
