Biwo Entegrasyon Nasyonzini an Ayiti di li preyokipe ak koze prizonye k ap mouri nan peyi a

Biwo Entegrasyon Nasyonzini an Ayiti atravè yon twit li pibliye nan dat 28 jen 2022, di li vrèman preyokipe ak monte divès ka prizonye k ap mouri nan prizon sivil Okay la.

Kote li kondane lanmò plizyè prizonye akoz grangou, swaf dlo, etoufman, elatriye nan prizon sivil Okay la.

Depi anviwon yon semenn, komisè gouvènman nan Tribinal sivil Okay la, Ronald Richemond, te voye yon alèt pou move kondisyon prizonye yo ap sibi nan prizon Okay la, kote uit (8) ladan yo gentan mouri deja.

Biwo Entegrasyon Nasyonzini an Ayiti di li pare pou l sipòte tout jefò gouvènman an deside fè sou koze sa :” Analize divès koz ki fè lanmò prizonye ap ogmante byen rapid epi pran plizyè mezi ki nesesè pou amelyore kondisyon lavi prizon yo nan tout peyi a”.

Nan lespwa pou redui kantite moun ki pral nan prizon isit, Biwo Entegeasyon Nasyonzini an Ayiti di:
“li ankouraje otorite jidisyè yo reprann odyans yo nan Tribinal yo, sitou sak nan jiridiksyon Okay yo. Paske, li vle yo redui nan kantite detansyon prevantiv pwolonje nan Okay”.

Poutan depi jen 2021, yon rapò enstitisyon onizyenn te deja pibliye nan dènyè bout manda li: ” Prizonye yo vrèman nan move kondisyon, akoz fenomenn kantite moun k ap rantre nan prizon yo An Ayiti”.

Sa vle di, prizon Okay la pa sèlman kote anpil prizonye ap mouri akoz plizyè rezon. Pa gen twò lontan 2 prizonye Jakmèl sot mouri nan dat mèkredi 22 jen pou rive 23 jen 2022. Pandan, okenn enfòmasyon poko janm di kisa ki ta lakoz lanmò sila yo jiskadat.

Comments

commentaires