Brigad Entèvansyon Teyat Ayiti (BIT-Haiti ) òganize yon pakèt fòmasyon sòti 13 me pou rive 24 me 2024 la ki gen rapò ak Teyat nan kan moun ki deplase yo nan vil Pòtoprens, selon sa a jounal Le Nouvelliste rapòte.
Pwojè sa a pote non : «Teyat kwape vyolans» nan lide pou motive ti moun sa yo k ap sove pou vyolans gang ak zam nan peyi a.
Li enpòtan pou n konnen pral gen 3 kan nan vil Pòtoprens k ap benefisye atelye fòmasyon sa yo atravè BIT-Haiti : «Se te devwa nou pou n ale nan kan moun ki deplase sa yo ki sitiye nan zòn Metwopolitèn nan, sitou sa a ki konsène sitiyasyon fanmi sa yo ap viv, ti moun yo resevwa fòmasyon nan atelye sou atizay ak Teyat nan lide pou yo jwe ak fè yo reflechi.» se sa a direktè atelye a, Eliézer Guérismé, fè konnen. Li menm ajoute pou l di pwojè sa a jwenn sipò Wo Komisè Nasyonzini pou Dwa Moun (HCDH), Ministè Kilti ak Kominikasyon (MCC), Pwogram Nasyonzini pou Devlopman ( PNUD) epi Tamise.
BIT-Haiti avanse pou l di sila yo ki deplase yo ap viv nan kondisyon difisil akoz mank dlo pou yo bwè epi dòmi pil sou pil. Yo ka pran maladi po epi yo manke lwazi ak jwèt pou yo jwe. Se poutèt sa a, li te ijan pou Brigad Entèvansyon Teyat Ayiti (BIT-Haïti) te mete kanpe inisyativ atistik ak kiltirèl pou retabli lespwa ak ankouraje rezistans nan mitan ti moun yo.
«Pral gen 11 ti moun ki pral suiv fòmasyon sa a pandan 10 jou epi patisipe nan pwojeksyon televizyon. Pral gen aktris tankou Jenny Cadet ak sikològ edikatif epi direktris Stéphanie François k ap gen pou entèvni nan fòmasyon sa a.», selon sa a direktè BIT-HAITI ajoute.
Pou fini, n ap soulinye Brigad Entèvansyon Teyat Ayiti (BIT-HAITI) te fèt nan dat 15 desanm 2011, li se yon asosyasyon kiltirèl apolitik ak san konfeksyon k ap travay nan domèn atizay pèfòmans. Se yon asosyasyon kiltirèl ki reyini aktè ak komedyen ayisyen.
N ap raple inisyativ sa fèt nan kad pwojè «PBF Infrastructure de paix» ki anba kowòdinasyon jeneral Tamise ki reyini 41 asosyasyon kiltirèl epi lòt aktè tankou komedyen ak atis pou mennen yon kanpay sansibilizasyon pou lapè ak respè dwa moun sòti mwa avril pou rive mwa jiyè atravè plizyè depatman nan peyi a.
Atik sa se pwopriyete prive © Gwoup Medya MAGHAITI 2024
