Jounen jodi jedi 13 oktòb 2022 a, selon responsab Komisyon Nasyonal Depoze Zam ak Demantèlman epi Reyensèsyon (CNDDR) Jean Rebel Dorcenat, «Bandi yo mande pou yo bay yo amnisti, pou yo gen moun nan gouvènman an epi retire manda dèyè yo. Se sèl rezon sa k ap fè yo debloke Tèminal vare», se sa Dorcenat di sou Radyo Mega.
Depi lè premye minis defakto Ariel Henry te fin di gaz la pral disponib nan tout ponp yo, chèf gang G9 la, Jimmy Cherizier alyas Babekyou pa te pran tan pou li te anonse li pral bloke tèminal vare, ki se kote peyi a estoke 70% gaz.
Jean Rebel Dorcenat, ki se responsab CNDDR konseye yon antant ak bandi yo pou fasilite yon koulwa imanitè, kote enstitisyon Lopital, Konpayi telefòn, radyo, dlo pòtab, elatriye kapab jwenn gaz pou yo sèvi.
Anplis, responsab Komisyon Nasyonal depoze zam ak demantèlement epi Reyensèsyon (CNDDR) pa te kache pou li di bandi yo pa ebranle pou koze entèvansyon militè etranje yo, men yo pito mande leta santral pou bay yo amnisti, yo dwe gen reprezantan nan gouvènman an epi retire manda dèyè yo.
Gouvènman anplas la te mande sipò fòs militè etranje nan lide pou vin ede yo batay ak bandi ki kenbe gaz nan tèminal vare, anplis reparèt kolera nan peyi a.
Jean Rebel Dorcénat revele gen anviwon 11 fanmi k ap vann zam ilegal nan peyi a, men pou rezon sekirite manm komisyon an, li pa chwazi site non yo.
N ap raple reprezantan sekretè deta adjwen Ameriken an, Brian Nichols gen pou li pase 2 jou nan peyi a, nan kad pou yon dyalòg avèk aktè politik yo, sa ki ta dwe pèmèt Etazini pote kole ak moun ki nan bezwen swen yo nan koze kolera.
Atik sa se pwopriyete prive ©️ Gwoup Medya MAGHAITI 2022
Discussion about this post