Alòske yo rive mete dife nan anviwon yon 10èn sou komisarya ak komisarya nan lakou Pòtoprens pandan dènye jou sa yo, fwa sa nèg ak zam yo deside piye epi boule jodi jedi 14 mas 2024 la, lakay direktè jeneral lapolis la, Frantz Elbé. Anplis divès imaj ki montre zak la fèt toutbon, youn nan sendika Lapolis la nan bò pa yo rive konfime aksyon sila sou kont X (Twitter) yo.
“SYNAPOHA konfime bandi piye epi mete dife nan Kay Direktè jeneral polis la Frantz Elbé nan santo 17, sa pase nan mitan jounen jedi 14 Mas 2024 la“, se sa responsab yo fè konnen nan mesaj yo bay la.
Yon lòt kote, endividi ak zam yo te rive atake direksyon jeneral lapolis la tou kote bal pa t sispann chante, sepandan poko gen okenn detay pou ta konnen si ta gen viktim ni pou ta konnen kibò Dg lapolis la ye nan moman an, puiske yo pike dife lakay li. N ap fè konnen, premye sitwayen nan kò polis la te prezan nan seremoni sòti 33yèm pwomosyon lapolis la lendi ki te 11 mas 2024 la.
Atik sa se pwopriyete prive ©️ Gwoup Medya MAGHAITI 2024
