Nan yon nòt nan dat 14 Avril 2022, MSPP fè nou konnen gen yon maladi gratèl ki parèt sou fòm gal k ap ravaje plizyè kote nan peyi a, maladi sa gentan touche plizyè moun nan popilasyon an, sitou nan zòn an pwovens, tankou komin Kenskòf.
Minis aktyèl sante a fè nou konnen plizyè fason nou ka remake sentom ak siy maladi sa, tankou pikotman, bouton ak gratèl k ap toumante nou pandan tout lannuit, elatriye. Minis sante a rekòmande pou n ale nan sant laswenyaj ki tou prè nou ki la pou sa.
Anplis, li kontinye pou l di nou kèk mezi ak prekosyon nou dwe gade pou nou ka evite atrape maladi sa, tankou sa yo : Evite kole sere ak moun ki gentan pran maladi sa, dezenfekte rad n ap mete sou po ak sèvyèt n ap siye kò nou epi dra n ap kouche, pa neglije trete dlo n ap benyen ak fè twalèt nou, konsa tou pa plede grate kò nou nan moman sa, menmsi nou ta gen anvi an, elatriye.
Boutofen, Minis lan mande pou n rete byen fè m ak veye epi kolabore pou anpeche maladi an pran tout kò peyi a. Poutan, li pa rive ekri kòman ministè ap pote kole ak lokalite ki deja enfenkte ak vilnerab yo, sitou nan koze dlo pòtab.
© Tous droits réservés – Groupe Média MAGHAITI 2022
