Pwoteksyon sivil anonse sezon siklòn pou ane 2024 la kòmanse depi jodi samdi premye jen an. Daprè kalandriye yo pibliye sou paj Fesbouk yo, ane sa Ayiti pral fè fas ak 21 siklòn pou sezon sa.
«Sezon siklòn 2024 la kòmanse jodi samdi premye jen an, nan Oseyan atlantik, Gòlf Meksik ak nan basen Karayib la», daprè sa Pwoteksyon sivil anonse sou. Se pou sa, otorite yo konseye tout moun chache konnen si kay yo pa nan zòn ki konn gen inondasyon, oubyen deboulonnay tè.
Albèto ta dwe premye fenomèn meteyowolojik k ap frape Atlantik Nò a, Karayib la ak Gòlf Meksik la. Aprèsa, nou jwenn youn aprè lòt Berryl, Chris, Debby, Ernesto, Fransine, Gordon, Hélène, Isaac, Joys, Kirk, Leslie, Milton, Nadine, Oscar, Patty, Raphaël, Sara, Tony, Valérie ak William kòm siklòn yo prevwa k ap pase sou peyi a tou.
Yon lòt kote, espesyalis yo fè konnen peryòd siklòn sa k ap fini 30 novanm 2024 la, li pi wo pa rapò ak jan l ta dwe ye a. Sa ki vle di, ka gen gwo konsekans pandan tan sa. Mete sou 21 siklòn yo, yo soulinye ap gen 5 nan yo k ap reprezante gwo danje.
Pou kounye a, daprè SOS HAÏTI-MÉTÉO gen yon zòn «ba presyon» ki kòmanse depi jodi a. Sa ki fè, yo revele ka gen anpil lapli nan lès Kiba, Jamayik, Sendomeng, Ayiti, ak yon pati nan Pòtoriko.
N ap raple, jedi ki te 30 me 2024 la an prezans plizyè pèsonalite tankou prezidan Konsèy prezidansyèl tranzisyon an, Edgar Leblanc Fils, Pwoteksyon sivil te louvri Sant operasyon ijans nasyonal (COUN) nan Pòtoprens. E se nan dat sa tou yo te tou pwofite lanse sezon siklòn nan, kote yo konseye tout moun pou rete veyatif fas ak sitiyasyon sa a.
Atik sa se pwopriyete prive ©️ Gwoup Medya MAGHAITI 2024
