Nan yon nouvo videyo Baky Popilè sòti jou 9 novanm ki sot pase a, ki rele “Mete Limyè Sou Mwen”, nou ka remake nan yon sekans atis la mete dife nan yon kouwònn, ki ta sanse reprezante yon kout toya sou ansyen zanmi l Wendy Traka, ki li menm toujou rele tèt li “King (Wa)”. Depi lè videyo sa finn pran lari, deblozay eklate sou tout rezo sosyal yo ant fanatik Wendy ak Baky. Zen an melanje, animatè kiltirèl yo ap fè ti dife volan pou alimante bòz la. Tout moun ap rale agiman, fè literati, yo finn tounen avoka nan defann pozisyon yo. Men chèf koze a ki se Wendy, pa janm rache yon mo, li rete an silans e se silans sa k ap toumante anpil moun.
Sa gen plis pase 4 lane, nou te konn remake Wendy nan baz ak kèk lòt rapè tankou Trouble Boy, Baky Popilè, Thelo epi Beatmaker MagicTouch. Mesye sa yo te konn pwodwi anpil bèl mizik ak videyo, pèfòme epi trip ansanm. Nou te konn ap swiv tou bèl relasyon amourez ant Wendy ak Shishie, kite reprezante yon egzanp bon jan lanmou pou jenès la. Men nan yon bat je tout relasyon sa yo fonn tankou bè, moun yo vinn dozado epi youn ap choute sou lòt sou rezo yo.
Atik sa pa fèt pou pale de ralasyon zanmitay atis yo, ni de maladi mental Wendy te genyen an, men se pito yon repons pou tout moun ki ta vle fè kwè Wendy pa regle anyen serye pou ane sa.
An nou konsantre nou sou ane 2021 an sèlman pou nou pa gaye. Aprè anpil deblozay politik, Wendy sòti yon premye videyo ki rele “Longue vie”, ki te fè anpil sansasyon pou epòk sa a paske anpil lòt atis pa t ap oze pran risk sa. Atis la te chwazi fè videyo sa nan yon dezè, kote tout moun yo te gen degizman seri popilè ki rele Casa Del Palpel la. Plis pase 2 800 000 moun gentan gade videyo sa sou Youtube.
3 mas 2021, Wendy lage yon lòt videyo ki rele “Sil pa nou li pa bon” ki gen plis pase 4 200 000 moun ki gade l sou Youtube. Anpil rapè te estomake, yo t ap plenyen anba anba sou rezo sosyal yo paske yo te konsidere mizik la tankou yon atak. Menm Fantom te pran nan gaz.
3 me 2021 an, Wendy sòti yon EP ki rele “Lvar Saison 1” ki gen 6 mizik sou li: Long vi, Saw panse, Bruce Lee, Lento, Sil pa nou li pa bon, ak yon Outro. Nan mwens pase 24 èd tan, albòm lan pran 12zyèm plas sou Itunes, epi nan demen li pran 2zyèm plas la sou menm platfòm lan kote se nouvo albòm Dj Khaled la kite an premye pozisyon.
Nan menm 3 me 2021 an, Wendy te sòti yon twazyèm videyo pou ane a ki rele “LENTO”, ki te fè 1 000 000 vizit nan 48 èd tan. Pou kounye a, videyo gen plis pase 6 800 000 moun ki gentan gade l.
Apre tout gwo reyisit sa yo, atis la ta pral pran anpil frap sou rezo yo pandan gran vakans lan, paske li te deside al fè yon konsè vityèl an kolaborasyon ak “Bigo Production”, ki se biznis Olivier Martelly pitit ansyen prezidan Michel Martelly. Kòm koze politik pa bò isit se tout tivis, Wendy te pran frap nan po tèt li epi li tou bay poze a.
Donk, agiman moun k ap di Wendy mouri nan game lan ane sa pa kenbe. Yon atis ki sòti yon EP ki gen 6 mizik, ak 3 videyo nan yon peryòd ki plen kriz politik paka fè pati de moun ki disparèt yo. Okontrè, menm si li pa reponn oubyen poko reponn Baky, fanatik li yo ap fè anpil bri pou li epi rekadre animatè ki anvi moute mal yo.
Sa pa yon sekrè pou pèsònn, Wendy Traka se youn nan rapè ki pi konplè e ki pi pwodiktif nan endistri mizikal la pou 10 dènye ane ki sot pase yo. Se vre li pa yon gwo pawolye tankou Blaze One, Blay-Z oubyen D-Fi, men Wendy se youn nan atis ki konprann piblik ayisyen an epi ki adapte l ak atant li san konplikasyon, san kase tèt.
An pasan, videyo Wendy te fè avèk Jeff Prosper a ki rele “M aprann”, kite sòti 17 jen 2018 lan, moun yo gentan gade li plis pase 15 000 000 fwa sou YouTube. Lòt videyo ki popilè ankò se “Paka Viv avèl – paka viv san li” gen plis pase 12 000 000 vizit sou Youtube. Li te sòti videyo sa ansanm ak ansyen mennaj li Shishie 9 mas ki sot pase a.
© Tous droits réservés – Groupe Média MAGHAITI 2021
Discussion about this post