Alòske yo te sipoze pase 6 mwa pou pi piti ap fòme avan yo vin sou teren an, enbyen jodi lendi 11 mas 2024 la, otorite polisyè yo rive gradye 33yèm pwomosyon lapolis la, akòz klima ensekirite a. Sa ki vle di, polisye ak polisyè sa yo ta deja pare pou vin pwoteje epi sèvi popilasyon Ayisyen an sitou nan moman sa kote nèg ak zam pa sispann atake divès estrikti nan enstitisyon polisyè a.
Malgre okenn nòt ofisyèl poko sòti pou di efektivman gen yon nouvo pwomosyon nan lapolis la ki gradye jodi a, men selon divès videyo k ap sikile sou rezo sosyal yo ak selon SPNH-17 la, gradyasyon 33yèm pwomosyon an rive fèt jodi lendi a kanmenm, kote absans plizyè gwo chèf te vizib tankou chèf Konsèy Siperyè Polis Nasyonal la (CSPN), Ariel Henry ak minis jistis la, Emmelie Prophète. Se yon aksyon selon sendika a ki pa nòmal ditou puiske yo estime nan moman an, lapolis la ta sipoze plis fòme pase jan li ye la kounya.
“SPNH-17, Sendika Lapolis la, sezi wè DG Elbé Frantz òganize gradyasyon mesyedam 33yèm pwomosyon lapolis la ki pa pase tan nòmal yo dwe pran fomasyon an ki se 6 mwa pou pi piti. Polisye sa yo gradye sou 4 mwa akòz ensekirite. Sendika Lapolis la, panse nan moman sa polisye yo ta dwe pi byen fòme pou yo kapab fè fas ak sitiyasyon ensekirite a pi byen”, se sa responsab yo nan sendika a fè konnen sou kont X (Twitter)yo pandan yo pa bliye soulinye nan 4 mwa sa aspiran sa yo pèdi plizyè semèn nan peryòd enstriktè yo te nan grèv ak pandan yo pa t ka vini nan akademi an.
Nan ka sa, sendika a fè tout moun konnen sa se yon rezon anplis ki pwouve direktè jeneral lapolis la, Frantz Elbé pa gen plas li nan tèt enstitisyon an. Konsa, li fini pou di l “Polisye yo bouke pran wont chak jou nan men bandi ak popilasyon an. Yon lòt lidèchip pou yon lòt Polis”.
Atik sa se pwopriyete prive ©️ Gwoup Medya MAGHAITI 2024
