Nan yon kominike ekip atis Wens Jonathan Désir sòti jodi madi 18 jiyè 2023 a, yo fè konnen yo te louvri ankèt sou akizasyon ki te fè kwè se pa te ak bon Kendrick Lamar la Mechans-T te kolabore sou albòm « À table» la. Nan nòt sa ekip atis la konfime rimè k ap sikile nan lari a.
Anvan albòm nan te sòti, Mechans-T te fè konnen Kendrick Lamar ak L.A.X se 2 atis etranje k ap sou pwojè sila. Nan sans sa, 10 jiyè ki sot pase la a, atis la te sòti dezyèm albòm li kote nou te jwenn plizyè atis Ayisyen ak 2 atis etranje yo. Kèk tan aprè pwojè a te fini sòti, anpil rimè te pral kouri pou di se pa ak bon Kendrick Lamar la atis la te kolabore. Pale anpil sa yo te pral pouse estaf atis la te louvri yon ankèt sou sa.
« Rezilta nou yo sijere, kontak nou an ki se Daddy Gray ta viktim yon Scam ki sòti nan yon moun ki konn imite epi pwodui vwa atis entènasyonal Kendrick Lamar », se sa ki ekri nan nòt la, kote atis la fè konnen li eskize l pou sa ki rive a.
« Ekip nou an deja pran dispozisyon ki nesesè pou li evite sitiyasyon sa a repete ankò », toujou selon nòt sila.
Atis la pwofite pou li fè nou konnen mizik li te sòti avèk fo Kendrick Lamar la ap genyen yon lòt vèsyon ki disponib nan jou k ap vini yo. Anplis, li fè konnen ekip li a ap kominike nou plis sou sa nan jou k ap vini yo.
Atik sa se pwopriyete prive ©️ Gwoup Medya MAGHAITI 2023
