Asosyasyon Pwofesyonèl Bank yo (APB) anonse jounen jodi 1e oktòb 2022 nan yon nòt pou laprès, apati lendi 3 oktòb k ap vini an, tout bank yo pral fonksyone nan yon orè espesyal. Desizyon sa pran nan objektif pou sèvi popilasyon an, malgre gwo kriz gaz peyi a ap fè fas depi kèk jou.
Nan nòt sa a, asosyasyon k ap jere bank yo fè tout kominote a konnen tout sikisal bank yo ap louvri pòt yo pandan 3 jou nan yon semenn. APB te tou pwofite anonse mezi sa pral kòmanse pran nan jou lendi 3 oktòb k ap vini la. Bank yo pral fonksyone sèlman lendi, mèkredi epi vandredi, toujou selon menm nòt sa ki ekri a.
N ap raple pi gwo sant estokaj peyi a, Tèminal Vare fè konnen nan dènye twit li yo: « Sitiyasyon an pa chanje, pa gen okenn kamyon ki chaje nan sant estokaj la depi 12 septanm 2022“. Nan sans sa Asosyasyon Pwofesyonèl Bank (APB) yo pran desizyon sa pou sèvi kliyan bank yo ak ti rezèv gaz yo genyen an. Yo fè konnen tou y ap bay sèvis toutotan ti rezèv gaz yo a penmèt yo fè sa.
Pandan yo konte sou konpreyansyon chak grenn kliyan ak popilasyon an,
Asosiyasyon Pwofesyonèl Bank (APB) yo swete otorite etatik yo jwenn bon jan solisyon pou retire peyi a nan kokennchenn kriz sa.
Atik sa se pwopriyete prive ©️ Gwoup Medya MAGHAITI 2022
Discussion about this post