Nan yon entèvyou li anrejistre pandan jounen 1e me 2023 a, premye minis defakto a Ariel Henry te pwofite fè plizyè pwomès avèk nasyon an, sitou avèk paran elèv lekòl yo, ouvriye faktori yo epi transpò piblik la.
«Se gras avèk ogmantasyon resèt yo leta rive konplete lajan Fon Monetè Entènasyonal (FMI) bay pou pwogram «Good Shock rundo» ki pral pote yon soulajman dirèk avèk 8000 fanmi pou resevwa dirèk sou telefòn yo yon ti tchotcho an 2 oubyen 3 vèsman ant jodia pou rive septanm 2023», selon deklarasyon chèf Primati an ki fè konnen sa ap konsène anviwon 500 mil paran elèv lekòl ki vilnerab, 60 mil anviwon ki nan faktori epi 100 mil nan transpò piblik la.
Nan jounen fèt agrikilti ak travay la, premye minis Ariel Henry avèti popilasyon an kèk travay li pral mete an fonksyon pou penmèt yo ka rale yon souf avèk lamizè a, tankou «netwaye kanal, kire sistèm irigasyon, travay pwoteksyon basen Vensan, elatriye», toujou nan kad entèvyou sila.
Sou lòtbò a popilasyon an pa sispann mache kontre bandi nan katye popilè yo, ansanm avèk Lapolis avèk slogan « Bwa Kale» a, kote yo vle arete oswa masakre yo akoz tout krim yo fè.
«Ayiti chwazi demokrasi, ensekirite n ap viv la revòltan, pèp la bezwen reprann aktivite li, nou konprann nou bouke. Men, pa kite move plan fè nou fè jwèt bosal. Tèt frèt, tankou sa fèt nan vil Okap la, kote lapolis ak pèp la mare tout bandi pou remèt bay lajistis», selon sa chèf Primati a di.
Pou kesyon ensekirite a, Premye minis la te mansyone demach l ap fè.
«Gouvènman an janm te pwomèt nou an ap travay avèk tout patnè lokal kou entènasyonal pou nou tabli sekirite nan peyi an. Vle pa vle ak wè pa wè sa gen pou fèt».
Anplis, premye minis lan kontinye pou li di «M ap mande tout konpatriyòt nou pou yo rete tèt frèt, mwen konprann kòlè yo, mwen konprann yo ta renmen fini avèk ensekirite a. Se pou sa m ap mande tout moun kontinye kolabore avèk Lapolis, kontinye bay enfòmasyon sou tout moun ki sispèk nan zòn lakay yo.»
Popilasyon an nan pwovens kou kapital, pran responsabilite yo an men pou kwape malfra k ap simen latwoublay nan peyi an pandan plizyè ane. Yo mete barikad tout lannuit epi mache chache nèg ak zam.
«Akoz ensekirite nou pèdi anpil travay, anpil moun pati kite peyi a, avèk ensekirite sila pèsonn etranje pa vin envesti nan peyi an pou kreye yon kantite travay», selon Ariel Henry.
Atik sa se pwopriyete prive ©️ Gwoup Medya MAGHAITI 2023
