Nan diskou premye minis Ariel Henry fè jodi dimanch 11 jen an nan somè peyi ki manm CARICOM la, li deklare patisipasyon l nan reyinyon sila se pa pou fè lòt negosiyasyon sou okenn lòt akò, men se pito pou li menm ak tout lòt aktè yo met tèt ansanm pou jwenn wout lapè pou peyi a.
“Nou pa vinn isi a pou negosye lòt akò. Nou la pou n antann nou ak konpatriyòt ki bay enterè nasyonal la enpòtans epi rive nan chimen k ap mennen nou pou n rekonstui demokrasi nou an“, daprè sa chèf gouvènman an fè konnen pandan l fè konprann tou, depi se kote ayisyen tanmen diskisyon sou pwoblèm peyi a, li dwe toujou la.
Yon lòt bò, pandan diskou l la, chèf gouvènman an te voye yon mesaj bay kèk aktè ayisyen ki selon li menm, pa t reponn ak envitasyon Wo Konsèy Tranzisyon an te fè yo nan mwa me pase a. Pandantan sa, li soulinye malgre gen kèk konpatriyòt ki pa pou bon jan dyalòg vre, li menm ak tout gouvènman l la bay tèt yo pou misyon pou yo retabli demokrasi nan peyi a pandan y ap tou chache òganize eleksyon yo.
“Depi lè m rive nan tèt gouvènman an, m te pran angajman pou m t al rankontre tout sektè nan vi nasyonal la pou n dyaloge, jwenn ansanm wout epi kreye mwayen pou tabli demokrasi pandan n ap kreye kondisyon pou pèp ayisyen an ka chwazi lib libè dirijan l yo. Se sa m te toujou fè, se li m ap toujou kontinye fè“, nan pawòl Ariel Henry.
Atik sa se pwopriyete prive ©️ Gwoup Medya MAGHAITI 2023
