Kèk tan aprè Konsèy Prezidansyèl Tranzisyon an te fin deklare se Garry Conille yo chwazi kòm premye minis peyi a, divès pèsonalite te reyaji pou felisite l. Selon deklarasyon moun sa yo, chwa sa a kapab mennen peyi a sou wout lapè ak sekirite.
«M felisite doktè Conille dèske Konsèy Prezidansyèl Tranzisyon an te chwazi l pou vin nan pòs premye minis peyi d Ayiti. Nan kontèks ki diferan sa a, men ki enpòtan pou peyi a, se pou manda sa a pote lapè ak pwosperite n ap chache depi lontan an», se deklarasyon sa a youn nan manm Konsèy la, Smith Augustin, fè pou okazyon an.
Nan menm dosye sa a, plizyè pati politik, yo menm tou, te deside felisite nouvo PM nan. Pami yo nou jwenn Ayiti An Aksyon(AAA) ki gen ladan l ansyen palmantè Youry Latortue ak Rezistans pou Ayiti. Nan kominike responsab AAA yo te pibliye, madi 28 me 2024 la, yo fè konnen yo dakò ak chwa a men yo konseye tou pou gwo zotobre yo prese fòme gouvènman an. Daprè yo menm, se yon fason k ap pèmèt yo rezoud pwoblèm sekirite a pi rapid.
Yon lòt kote, nou jwenn Jean Rodolphe Joazil, Inel Torchon, Alix Didier Fils-Aimé kòm kandida ki te nan kous ak Garry Conille ki fè deklarasyon pa yo tou. Selon estimasyon Me Inel Torchon chwa 6 manm KPT yo se pa yon kado, se pito yon gwo responsabilite direktè nan Nasyonzini an gen sou do l. Paske l presize, se nan enterè pèp ayisyen an desizyon an fèt kon sa a.
«Etap enpòtan sa a pase anba je mond lan ak anpil enterè, sa a montre volonte frè ak sè nou an Ayiti genyen pou yo ale pi devan. Kenya eksprime tout solidarite l ak Ayiti, pandan nou pa kapab tann pou n travay ak yo epi gouvènman yo a pou remete Ayiti sou wout devlopman dirab la», se pawòl sa yo prezidan kenyan an, William Ruto, ekri sou kont X (Twitter) li jodi mèkredi 29 me 2024 la.
Pou sa a ki gade gouvènman ki ta dwe enstale nan peyi a, selon Radio Métronome kabinè ministeryèl la kapab fèt vandredi k ap vini la. Epi enstalasyon yo ta dwe fèt semèn k ap rantre a. Fòk nou di tou, Konsèy Prezidansyèl Tranzisyon an apèn sot nonmen pou yon mwa Michel Patrick Boisvert kòm Premye minis k ap jere enterimè a.
Menmsi, doktè Garry Conille pa sou teritwa ayisyen an depi kèk lane, li di li se yon lonè pou li epi l deklare: «Ansanm nou pral travay pou yon demen miyò pou tout pitit nasyon nou an».
Atik sa se pwopriyete prive ©️ Gwoup Medya MAGHAITI 2024 de
