Yon fotograf Ayisyen ki pote non Josué Azor akize ajan imigrasyon dominiken yo, y ap arete moun sou koulè po yo. Daprè li menm se Yon zak rasis otorite sila yo ap fè sou Ayisyen yo, pandan yo inyore kiyes nan yo ki regilye nan moman y ap arete yo a.
“Polisye yo ranmase jèn gason yo san okenn prèv, kote yo chwazi yo pa rapò ak koulè po yo“, se sa Josué deklare bay AFP aprè li menm te fin viktim nan youn nan operasyon depòtasyon otorite dominiken yo tabli nan peyi vwazen an depi kèk mwa, malgre li se yon sitwayen regilye.
Daprè enfòmasyon jounal Diario Libre rapòte sou jèn fotograf Ayisyen sa a, nan moman polisye dominiken yo te arete l la, li te gen tout dokiman ki pèmèt yon moun ka sikile byen nan Sendomeng. Jounal la soulinye tou, “Josué Azor vwayaje pou rezon pwofesyonèl, paske li ap travay ak zanmi dominiken l yo sou yon fim animasyon”.
Daprè temwanyaj jèn gason an, malgre tout papye l te kòrèk, ajan imigrasyon yo pa te okipe yo sou sa, yo te refize verifye papye li yo, sa ki te pèmèt li pase plizyè tan nan prizon menm kote ak 12 lòt konpatriyòt Ayisyen.
“Li te rete pandan plizyè tan, se jouk aprè kèk militan dominiken fin rive, yo te vini aprè youn nan zanmi l yo te rele yo, li te vin gen otorizasyon pou l pwouve li se yon sitwayen regilye”, toujou daprè sa jounal dominiken an ekri.
Pandantan sa, malgre Gwoup Api Rapatriye yo ak Refijye yo(GARR) ak tout depatman deta ameriken an t ap denonse nan jou pase yo move tretman moun po nwa yo ap sibi nan Repiblik Dominiken, otorite responsab yo te deklare se manti, yo te konsidere jijman sa yo tankou mo ki mal fonde, ki pa te gen anyen pou wè ak reyalite a.
Kontrèman ak mo otorite dominiken yo, temwanyaj Josué Azor la ak ajisman kèk sitwayen dominiken po nwa sou rezo sosyal yo, presizeman sou Tik tok sanble pi byen dekri reyalite rasis ki genyen lòtbò fwontyè a ak konfime tou dwa moun pa respekte nan pwosesis depòtasyon dominiken yo kont Ayisyen yo.
Atik sa se pwopriyete prive ©️ Gwoup Medya MAGHAITI 2022