Nan dènye bilan Direksyon Jeneral Pwoteksyon Sivil la bay ayè jedi 6 jen an, yo fè konnen gen 51 moun ki pèdi lavi yo, 140 lòt sòti blese nan move tan ki te blayi sou peyi a samdi 3 jen pase a. Konsa tou, yo di gen plizyè kay ki anba dlo epi menm genyen ki kraze.
Mete sou kote moun ki mouri ak sa ki blese yo, responsab yo di gen kounya 39 458 sinistre. Yon lòt bò, yo mansyone gen 31 591 kay ki anba dlo, pandan gen 2 445 lòt ki kraze oubyen andomaje.
Kontrèman ak plizyè bilan pwovizwa ki te fè kwè gen enviwon 11 moun ki te disparèt, nouvo bilan responsab pwoteksyon sivil yo bay ayè madi a, fè konprann gen 3 586 moun ki te nan gwo difikilte yo rive pote sekou san presize si sila ki te disparèt yo nan chif sila.
Pou kounya, selon responsab Inite Idwometeyowolojik Dayiti (UHM) yo, jouskounya peyi a gen posiblite pou l fè fas ak yon lòt move tan ankò pandan semèn nan, sitiyasyon yo estime ki ka fè plis dega toujou. Nan sans sa, nan tèt kole ak Direksyon Jeneral Pwoteksyon Sivil la yo envite popilasyon an toujou rete vijilan epi aplike tout konsiy otorite konsène yo bay.
Atik sa se pwopriyete prive ©️ Gwoup Medya MAGHAITI 2023
