Jan yo te anonse divès operasyon kont nèg ak zam yo, responsab yo nan lapolis la anonse pou jodi mèkredi 20 mas 2024 la, gen 4 bandi ki jwenn lanmò yo nan afwontman. Selon sa yo fè konnen, gen 3 nan endividi sa yo ki mouri se aprè yo te fin atake yon machin polis.
“Twa bandi mòtèlman blese depi nan 1è nan maten nan Reinbold sou wout Boudon an, se aprè yo te fin tire sou yon patwouy nan 40B a“, daprè sa responsab yo eksplike nan yon nòt yo apèn sòti.
Sepandan, nan menm kominike sa pi wo yo nan enstitisyon an konfime chèf gang Mackandal se 4yèm bandi ki pèdi lavi l tou jodi a nan yon operasyon lapolis te tanmen nan zòn Petyonvil. Chèf gang nan jwenn lanmò l nan operasyon bw* kale, pèp la fè sou li kèk tan aprè li menm ak akolit li yo te kòmanse ap bay pwoblèm nan Britsou .
N ap fè soulinye, endividi a mouri kèk jou aprè kout bal pa t sispann chante nan prèske tout zòn nan Petyonvil la kote tou gen anviwon 30 moun nan popilasyon sivil la ki masakre. Men jouskounya, non sèlman poko gen yon bilan disponib pou konn chif egzat yo men tou poko gen pyès otorite ki bay eksplikasyon pou ta konnen rezon lanmò moun sa yo sòti depi dimanch 17 mas la pou rive jodi mèkredi a.
Atik sa se pwopriyete prive ©️ Gwoup Medya MAGHAITI 2024
