Nan yon konferans pou laprès jounen jodi mèkredi 26 avril 2023 a, Pòt Pawòl lapolis la, Gary Desrosiers, te prezante bilan sou operasyon ki te fèt lendi ak madi pase a, kote li fè konnen gen 2 prezime bandi ki mouri nan zòn Kwadèboukè ak Bon Repo. Li enfòme gen plizyè zam yo jwenn epi 3 polisye sòti blese nan kad operasyon ki te fèt nan zòn Debisi a.
Selon bilan pasyèl responsab la bay la gen 4 fizi daso, 3 pistolè kalib 9mm, 35 telefòn, plizyè bal ki gen gwo kalib tankou (5.56, 7.62, 12), plizyè chajè zam, kat memwa, plizyè radyo kominikasyon, plizyè kle kay ak machin yo sezi. Anplis gen 3 polisye ki blese pandan 2 dènyè jou nan operasyon yo. PNH enfòme genyen 25 operasyon ki te fèt (10 pako, 9 Tijo epi 6 Tewodat), nan Kwadèboukè gen yon bandi ki mouri ki gen ti non Dyòl ak yon lòt ankò nan bon repo.
Nan yon lòtbò, komisè a felisite popilasyon an epi di kòman li kontan paske popilasyon an mete ansanm ak lapolis pou dechouke bandi nan peyi a. Men tou li mande yo pou yo pa aji ak vyolans konsa y ap bay pi bon randman.
«Se pou abitan zòn yo rete vijilan pou pwoteje zòn yo, parapò ak moun yo pa rekonèt ki ta vin nan zòn yo. Nan sans sa, nou envite moun yo pou pote kèlkeswa materyèl yo ta jwenn sou nèg ak zam epi mare endividi sa yo pote nan komisarya ki pi pre yo a», toujou selon deklarasyon pòt pawòl Lapolis la, Gary Desrosiers.
N ap raple depi lendi 24 avril la, nèg ak zam pa sispann tire avèk Lapolis, kote genyen 14 ki ta pral mouri Kanapevè nan yon ti bis paske popilasyon an te mete dife sou yo.
Atik sa se pwopriyete prive ©️ Gwoup Medya MAGHAITI 2023
