Diego Jean-Charles se non yon jèn gason 34 lane ki mouri jodi mèkredi a nan vil Jakmèl. Lanmò jèn gason an vini aprè fanmi l pa t ka jwenn oksijèn pou li nan lopital Sen Michèl depi yè madi a.
Daprè sa korespondan Radyo Karayib nan vil Jakmèl, Élie Lorvéus rapòte kèk temwen ki te sou plas fè konnen, Diego te pran nan gaz lakrimojèn lapolis te bay nan manifestasyon ki te fèt ayè madi 20 septanm lan nan vil jakmèl la. Pandan tan sa a, youn nan pwòch Diego yo deklare “se lopital la ki pa t vle bay oksijèn lan” paske daprè li menm yo te genyen l.
Toujou daprè sa pwòch Diego yo fè konnen “lopital Sen Michèl la pa te gen problèm oksijèn vre paske se lè jèn gason an fin trepase responsab lopital la fè konnen yo jwenn oksijèn lan”.
Yon lòt bò moun nan antouraj Diego yo menase pou y ale dechouke moun ki gen materyèl lopital Sen Michèl la lakay yo pou ale mete nan lopital la. Popilasyon nan riyèl kay Diego yo di yo bay lopital prive yo 2 opsyon se swa leta koupe chèk doktè yo oubyen yo fèmen lopital prive yo. Popilasyon nan riyèl meslè yo di “yo pap dakò pou doktè sa yo fè biznis sou do popilasyon jakmelyèn nan, paske y ap touche nan leta, epi yo gen pwòp lopital pa yo“, daprè sa kèk moun deklare jodi a aprè lanmò Diego Jean-Charles.
Mouvman revandikasyon yo pa t kanpe nan vil sidès peyi a ayè madi 20 septanm 2022 a, sa ki fè gen anviwon 9 jèn gason lapolis rive mete men sou yo pandan jounen manifestasyon sila a. Stevenson Jean-Louis, Junior Saint-Fort, Ronald Auguste, Lemy Dany Junior, Jerry Augustin, Jhon Élie Prévaud, Vaniel Lauzier Jean, Pierre-Louis Stanley Junior, se non sitwayen sa yo lapolis arete akoz yo t ap tire wòch nan manifestasyon ki te fèt nan vil jakmèl la.
Atik sa se pwopriyete prive ©️ Gwoup Medya MAGHAITI 2022
World
Discussion about this post