Nan dènyè rapò ankèt Inite Lit kont Koripsyon (ULCC) te sòti semenn pase a, li te revele yon lis 44 depite ki pa te janm deklare patrimwann enpo ak Direksyon Jeneral Enpo (DGI), pandan pasaj yo nan Palman an.
Selon Inite Lit Kont Koripsyon (ULCC), sila sa yo fè yon vyolasyon epi merite sanksyone anba atik 18 nan lalwa sou deklarasyon patrimwann, ki refere w ak atik 28 nan kòd penal Ayisyen an. Si nou pran site kèk non nan depite sa yo ki pa te fè ditou deklarasyon patrimwann yo pandan manda yo nan chanm lan, tankou : Caleb Desrameaux, Printemps Bélizaire, Victor Profane, Kétel Jean-Philippe, Jean Marcel Lumérant, Jean Marie Florestal, Bertrand Sinal, Pierre Féquière Julien, Roudy Dévil, Jacob Latortue, Lemaire Pierre, elatriye.
Yon pratik ki vrèman kouran nan peyi a, kote anpil otorite pa renmen deklare patrimwann enpo ak Direksyon Jeneral Enpo (DGI) selon “ULCC“. Kidonk, Inite Lit Kont Koripsyon te mennen ankèt sa pou li revele ansanm moun k ap detounen lajan piblik epi ki pa kòrèk ak sa lalwa di nan koze administrasyon li.
Inite Lit Kont Koripsyon (ULCC) te tou pwofite revele nan menm rapò sa pandan desanm 2020 pou rive fevriye 2021, te gen plis pase 18 000 goud kòm kat debi ki t al jwenn polisye ak anplwaye sivil ki te revoke yo sou direksyon Léon Charles nan tèt Lapolis la, ki se yon erè administratif grav ki komèt, selon sa medya anliy Métronome rapòte.
Pandanstan, Ansyen Direktè Lapolis la Léon Charles te fè konnen : “Tout fwa n ta admèt gen yon erè administratif grav ki te fèt, se yon pwoblèm ki egziste depi 14 an nan Lapolis la. Kidonk, ULCC ta dwe kòmanse ankèt li a depi nan egzistans enstitisyon an“, toujou selon menm medya sa.
Atik sa se pwopriyete prive ©️ Gwoup Medya MAGHAITI 2022
World
Discussion about this post