Atis tanbourinè Napoléon Eudes Sabatini, tout moun konnen sou non Wa Saba pèdi lavi l ayè jedi 14 mas 2024 la. Atis la fè vwèl pou peyi san chapo depi bò 8è nan maten, nan Lopital lapè akòz li t ap soufri ak yon anemi falsifòm SS epi lafyèv Tifoyid.
“Lanmò sa a pou mwen se tankou yon katastwòf, se tankou yon limyè ki etenn, se zantray mwen k ap rache, sitou Eudes se moun m t ap fòme nan tanbou ki te plis avanse, ki te ban m plis espwa nan relèv mwen…”, se pawòl sa yo Batala, direktè Fondatè Atelye Tanbou plen Minui an, pwononse avèk tout yon vag dezespwa. E se nan lekòl tanbou sa a tou, Wa Saba t ap pran fòmasyon pou aprann jwe tanbou.
Jèn tanbourinè sila a te fèt 17 oktòb 2005, nan ri Senmaten ak zòn Dèlma 2, li t ap viv nan ri Jozèf Janvye, anplis li t ap fè 9è A.F nan lise Tousen Louvèti (LTL). Atis la rive pèdi lavi l akòz maladi sa yo, e se yon lanmò ki touche anpil moun sou rezo sosyal yo.
“Li te konn jwe nan milye inivèsite a, li te gentan patisipe nan plizyè emisyon tele ak radyo, li te saj anpil e l te renmen tout moun ki bò kote l“, toujou daprè sa responsab atelye a ajoute nan kad entèvyou Mag Haïti te gen ak li.
Napoléon Eudes Sabatini, te sèl grenn pitit gason ak dènyè pitit nan fanmi li, avan lanmò l li t ap viv ak manman l, yon sè li, 2 nyès ak yon kouzin li, alòske papa l menm t ap viv nan peyi etranjeWa Saba te pral entegre atelye “Tanbou plen Minui” se nan dat ki te 11 mas 2022 a, se la li ta pral jwenn chans resevwa fòmasyon antanke tanbourinè epi militan kiltirèl.
“Mwen avèk Eudes te gen yon relasyon papa ak pitit, li te konn rele m papa anpil kote li rive, li te fè konnen se mwen ki papa l malgre papa l ap viv lòtbò dlo, li te kwè nan mwen kòm moun k ap ba l bon direksyon epi mwen te yon modèl pou li”, se sou dènyè mo chaje ak tristès sa yo Joseph Rony ki gen pou non vanyan Batala fini deklarasyon li yo.
Atik sa se pwopriyete prive ©️ Gwoup Medya MAGHAITI 2024
