SOL LUCET OMNIBUSUNIVERSITAIRE CITOYEN COV 19-4

Pòtoprens, 22 Me 2020

Kowonaviris, an nou mete mas pou pwoteje bouch nou ak nen nou e menm je nou.

Epidemi kowonaviris se yon maladi ki atrapan anpil e ki ka koze gwo dega nan sistèm òganis yon moun . Se yon viris pandan l ap pase de yon moun a yon lòt li ka kontamine yon bann ak yon pakèt moun nan de tan twa mouvman. Se konsa nou ka wè, vit e prese yon latriye moun nan yon lokalite, nan yon zòn oubyen nan tout yon peyi menm kapab kontamine e tonbe malad bridsoukou.
Kowonaviris sa a kapab bay anpil tèt chaje, laperèz ak gwo kè sote nan yon popilasyon. Se poutèt sa , se pou popilasyon an ka pran bonjan mezi pou kwape maladi sila a nan anpeche l layite l nètalkole. Si yon moun kontamine, li dwe pran tout mezi nesesè, pou pwoteje lòt moun ki bò kote l pou anpeche maladi a gaye. Yon moun kontamine kapab bay viris la, a twa kat lòt moun, e moun sa yo bò kote pa yo, ka kontinye ap simaye maladi a menm jan an. Kidonk, nou wè li nesesè pou mete mas ki ka byen bouche nen nou ak bouch nou.
Mete yon mas se yon ijans e se gentan pran devan pou bon jan pwoteksyon pou kwape kowonaviris nan peyi d Ayiti. Lè yon moun ap touse li dwe evite voye boulèt krache sou lòt moun ki ta anfas li. Nou gen lizay sa a deja nan kilti nou . Anplis kounye an, lè se yon moun ki kontamine anba kowonaviris si l ap touse, lè l gen yon mas ki bare nen l ak bouch li byen bare , li pwoteje anpil sila yo ki bò kote l . Lè n ap touse a, nou lanse yon seri boulèt krache, ki kapab tonbe nan bouch, nan nen ak nan je yon lòt moun ki bò kote nou, se konsa lòt moun sa a, kapab trape kowonaviris la. Nou p ap bouke kleronnen prensip mete mas pou bare nen nou ak bouch nou tou pou pwoteje tèt nou ak pwoteje lòt moun bò kote nou.
Lè yon moun ki gen kowonaviris ap touse, boulèt krache li kapab rive plis pase distans yon mèt senkant oubyen twa pa, yon bras oubyen de kout chenn nan longè pa nou . Anplis boulèt krache sa ka kontamine lòt moun, men gen tou ti farinay krache ki kapab rete nan lè a, menm si se pandan yon ti kras tan se yon malèpandye li ye tou. Ti farinay sa a ki rete nan lè an pandan 10 a 15 minit konsa kapab kontamine lòt moun k ap pase. Ti farinay krache sa yo gwo save yo rele yo ayewosòl. Alòs mete mas pou pwoteje bouch nou ak nen nou e menm je nou, se yon ijans sante piblik.
Groupe de professeurs FASCH

Comments

comments