Nan yon nòt Federasyon Foutbòl Ayisyen an te mete piblik ayè dimanch 16 avril 2023, li fè tout moun konnen « Seleksyon fanm nan kategori «U-20» p ap kapab patisipe nan eliminatwa mondyal k ap fèt nan peyi Kiraso, akoz kèk ladan yo pa gen viza pou yo ale.
«Sa eksplike pwoblèm tan sèvis koze bay viza a genyen nan peyi Dayiti parapò avèk sitiyasyon aktyèl la. Malgre nou te tanmen demach bò kote Konfederasyon Foutbòl Amerik Nò, Amerik Santral epi Karayib (CONCACAF) pou penmèt nou patisipe nan premye faz la. Men, paspò nou te rive bloke Kiraso ak Repiblik Dominiken ki t ap trete dosye sa», se sa Federasyon Foutbòl Ayisyen fè konnen avèk kominote Ayisyen an.
«Se yon veritab kokennchenn kalvè Foutbòl Ayisyen an ap konnen nan koze viza. Sa ki lakoz nou paka al patisipe nan chanpyona entènasyonal yo», toujou selon sa Federasyon Foutbòl Ayisyen an pataje kòm pwoblèm.
Federasyon an mande pou pèp Ayisyen an kontinye ale sipòte seleksyon Nasyonal la nan konpetisyon entènasyonal yo, nan objektif kote y ap fè flote drapo nasyonal la atravè Foutbòl.
Atik sa se pwopriyete prive ©️ Gwoup Medya MAGHAITI 2023
