Peyi Etazini jwenn kritik nan men direktris egzekitif “Haitian neighborhood center sant la”, Gepsie Metellus ki repwoche yo, akòz yo deside depòte vandredi 25 novanm pase a, 190 migran ayisyen ki gen ladan l 46 timoun, pandan moman kriz plizyè fasèt ki gen nan peyi a.
“Nan yon moman, kote ti gason 13 lane ap sibi zak vyolans, mond lan ap pale sou kriz peyi Dayiti yo, enpi se nan moman sa nou vle rapatriye migran ayisyen yo? M pa konnen si se Mezon blanch oubyen depatman deta ki te pran desizyon sa a, men nenpòt jan sa ye a, nou gen moun ki gen pouvwa ki malveyan e ki ap maltrete moun”, daprè deklarasyon Gepsie Metellus.
Nan menm sans sa, gad kot ameriken yo te anonse vandredi 25 novanm lan, gen 190 migran ayisyen ki deja rive nan peyi Dayiti sou bato Escanaba, ladan yo gen 89 gason, 55 fanm enpi 46 timoun, daprè presizyon jounal Listín Diario.
Alòske, responsab haitian neighborhood center Sant la, deklare otorite ameriken yo pa ta dwe ap depote migran ayisyen yo nan moman difikilte peyi a ap konnen yo. “Kòman pou y ap chache solisyon paske Ayiti nan yon move pas enpi kounya yo vle depòte moun yo ?, Nou pap bliye sa“, se sa direktris egzekitif la deklare toujou daprè sa jounal dominiken an fè konnen.
Haitian Neighborhood Center “Sant la” se yon òganis ki sitiye l nan sid Florid, li te kreye nan dat 6 desanm 2000. Objektif sant resous sila a se ede imigre Ayisyen yo ki nan eta Florid.
Pami sèvis “Sant la” ofri nan kominote imigre Ayisyen yo nan peyi Etazini nou ka site: yo ede sitwayen ki legal yo prepare demann natiralizasyon, yo ede etidyan finansyèman nan sousi pou yo ka peye inivèsite yo avèk program “Fon bous etid doktè Jean-Price Mars” la, yo kreye lòt òganizasyon pou reponn ak bezwen kominote ayisyen na tankou : Together For Children Northeast Corridor, Neighborhood Advisory Group(NAG) ak Haitian Philanthropy Coalition, yo mennen kanpay sansibilizasyon tou pou imigre Ayisyen yo, nan kad pou patisipe nan fòmasyon moun sa yo ak “Teleskopi” (ki se yon show televize).
N ap raple daprè chif Òganizasyon Entènasyonal Migrasyon (OIM) te kominike yo, pou mwa oktòb la te gen sèlman 88 migran ayisyen otorite ameriken yo te depòte an Ayiti.
Atik sa se pwopriyete prive ©️ Gwoup Medya MAGHAITI 2022
World
Discussion about this post