Rezo Nasyonal Majistra Ayisyen yo (RENAMAH) kondane ayè madi 14 me 2024 la zak asasinay ki fèt sou jij titilè Vertou Vertilus, nan lokalite Lestè (Depatman Latibonit). Lanmò jij la vini aprè nèg ak zam te kidnape li lendi 13 me ki sot pase a.
« Nou mande ak otorite jidisyè yo pou pran tout dispozisyon nesesè pou tradui lajistis tout moun ki fè krim sa», se sa RENAMAH
ekri nan nòt pou denonse zak sila.
Nan lendi 13 me ki sot pase la, bandi ak zam ki fè pati gwoup gang Kokorat san ras te kidnape jij la ansanm avèk Me Johnwesley Alerte pandan yo te sou moto pou rantre lakay yo, zòn Machann Desalin. Se nan moman sa tou, youn nan yo te resevwa yon bal bò figi li.
Fas ak sitiyasyon sa Rezo Nasyonal Majistra Ayisyen pran devan pou denonse lanmò jij la aprè yo te fin jwenn kadav li nan lokalite Lestè: « Gen twòp lèse ale otorite yo ki pa janm fè anyen pou popilasyon kont tibilans bandi k ap vyole ak touye moun nan peyi a san pini», se sa yo ajoute parapò avèk krim bandi kokorat san ras fè sou majistra a.
Pou fini, RENAMAH mande avèk tout majistra yo pou rete pridan epi vijilan nan moman sa. Epi yo egzije avèk otorite yo pou frennen fenomèn kidnapin k ap taye banda nan peyi a.
Atik sa se pwopriyete prive © Gwoup Medya MAGHAITI 2024
