Ajan Direksyon Nasyonal Kontwòl Dwòg(DNCD) nan tèt kole ak ministè piblik dominiken an, sezi nan yon konpayi maritim entènasyonal nan distrik nasyonal jodi mèkredi 18 oktòb 2023 a, plis pase yon demi kilo kokayin ki te nan 36 twouso(pòt kle). Selon Listín Diario, kokayin sa yo jwenn nan pòt kle yo te gen pou al jwenn yon madanm k ap viv nan peyi Etazini.
“Nan 36 pòt kle sa yo te genyen plis pase yon demi kilo kokayin, ki peze 510 gram. Ajan yo te sispèk gen yon pwodui etranj ki te nan yon bwat mawon, e li te vlope“, daprè rapò DNCD a.
Selon enfòmasyon responsab yo bay, moun ki voye dwòg la nan konpayi a pou l te ka al Etazini an, rete nan lokalite Mendoza nan Sendomeng. Poutan, moun ki ta dwe resevwa kokayin nan rete Massachusetts.
Pou kounya, pa gen okenn detay ki bay sou non 2 trafikan dwòg sa yo. Men, otorite yo fè konnen y ap mennen yon pi gwo ankèt sou sa paske yo estime se yon bann endividi k ap eseye detounen atansyon otorite dominiken yo.
Atik sa se pwopriyete prive ©️ Gwoup Medya MAGHAITI 2023
