Depi plizyè jou peyi Dayiti ap konnen yon ratman gaz, paske anpil ponp pa gen gazolin ni dyezèl pou yo vann. Majorite estasyon gaz nan zòn metropolitèn Pòtoprens lan fèmen. Nou pa wè okenn ponpis ni chofè moto ni chofè taksi k ap peye ak fè diskisyon pou plen pou yo.
Nan jounen vandredi 16 desanm 2022 a, sòti Pòtay Leyogann, pase Bwa vèna, monte Petyonvil se prèske tout estasyon gaz yo ki fèmen. Jan sa ye chak fwa gen ratman gaz, se sou tout wout la n ap konstate galon jòn ak ti galon nan men moun k ap vann gazolin atè.
Nan virewon nan zòn Kafoufèy la, bò estati mesye Kolo a, nou wè kèk jèn gason ak ti galon blan nan men yo k ap vann gaz atè. Chak fwa chofè moto ak machin vire, yo pa sispann rele yo pou fè pri ak yo.
Selon yon chofè moto :«Galon gazolin lan vann 1250 goud atè a, men konsa tou si n al achte kafou n ap peye li 1000 goud.»
Pwoblèm gaz la chak jou pi plis ap anvlimen sou teritwa a, anpil pale anpil ak bougonnen ap fèt nan lari a, kote pri kous yo ogmante epi jwenn machin pa fasil ditou. Toujou selon chofè moto a:«Gen dyezèl nan ponp Lali yo, men se gazolin lan nou pa fasil jwenn nan ponp. Sa ki lakoz nou oblije ogmante pri kous yo, malgre se nan chirepit nou ye avèk yo.»
Pase sou Bwa vèna, se tout atè ak bò plas n ap konstate machann k ap vann gazolin, pandanstan machin Lapolis ap monte ak desann devan yo. Touprè a n ap jwenn yon komisarya polis, lè n ap raple divès entèdiksyon komisè gouvènman an te bay pou anpeche moun vann gaz atè a ki se yon aktivite ilisit pou leta Santral.
Monte Petyonvil, nan ponp gazolin ki chita kò l nan ri Metelis la, yon kamyon te vin pou li bay gaz ayè vandredi 16 desanm lan, plizyè kamyonèt ak lòt machin epi moto te kanpe ap tann gaz. Anpil ti pale ak bougonnen epi blokis nan wout la. Yon chofè moto te pataje avèk nou: « Se 1500 pyas nou peye gazolin atè a la, kidonk lè n pran li nan ponp lan e nou peye l 540 goud, sak penmèt nou fè kòb lajan manje a.»
Nan pase nan estasyon ti bis Petyonvil pou pòtay Leyogann lan, sou tout wout gaz ap vann atè a, 2 ti jèn gason, youn ak mayo wouj epi djins epi lòt la avèk bout pantalon nwa ak mayo blan te rakonte nou : «Se pa nou ki lakoz sa, se avèk li nou oblije bwase pou n fè ti kòb nou pou fèt la, pa gen leta ki pou ede nou.»
Bò plas ponpye 2 machann gaz te pral prèske mete men nan kòlèt, yon fanm ak yon gason. Si se pa te prezans kèk polisye sa te ka mabyal, kòmkwa lòt la ta anpeche l vann kliyan li. Sak te etonan, Lapolis te pito mete Ola olye li arete revandè gaz sa yo nan lari a. «Kote pou n retire yon galon gaz atè a nan Petyonvil n ap bezwen 1500 goud, pandan li pa menm plen» deklarasyon yon chofè ki t ap achte yon galon gazolin nan pri an.
N ap raple leta Santral te anonse gen gaz ki disponib nan ponp yo, malgre sa, selon anpil chofè se depi prèske anviwon 22 jou yo pa wè gazolin, kote nou te remake anpil ponp pa fonksyone nan zòn Metwopolitèn Pòtoprens lan.
Nan menm jounen yè a, Tèminal ki nan zòn Vare kote leta konsève anpil gaz, te fè konnen genyen 587 900 galon gazoline ki ta pral distribye. Pandan tan sa a pri galon gazolin lan pa sispann ogmante atè a.
Atik sa se pwopriyete prive ©️ Gwoup Medya MAGHAITI 2022
