Prèske tout konplo touye prezidan ayisyen an te fèt Florid, Daprè yon pwokirè Ameriken

Markenzy Lapointe ki se yon pwokirè Ameriken deklare ayè madi 14 fevriye 2023 a, yon gwo pati nan plan ki te vize touye prezidan Jovenel Moïse la te tabli nan sid Florid nan kòmansman ane 2021 an. Pwokirè a te fè deklarasyon sa nan kad yon konferans pou laprès yo te bay nan lide pou mete limyè sou kèk pwen espesifik, selon Miami Herald.

Otorite jidisyè Ameriken yo bay kèk detay sou ansasinay ansyen prezidan Ayisyen an ayè madi a, aprè ajan federal yo te fin arete 4 sispèk kle nan dosye a daprè akizasyon ki peze sou do sitwayen sa yo.

“Prèske tout planifikasyon ak finansman epi sèvo konplo ki te vize touye prezidan an te fèt isit la menm Etazini, nan sid Florid sòti kòmansman ane 2021 an”, se sa pwokirè a fe konnen.

Nan menm sans sa, lajistis Ameriken deside pran devan akòz plan malouk sa ki sanse te planifye lakay yo. Avèk 11 prezime koupab ki deja anba men yo, otorite yo pa deside kanpe nan ankèt y ap tanmen sou kiyes ki ta sèvo asasinay prezidan Jovenel Moïse la.

“Aksyon yo a rive vyole lalwa Ameriken an, kounya la y ap fè fas ak lajistis Ameriken. Etazini p ap pral tolere pyès moun ki ta konplote pou komèt vye zak vyolans nan lòt peyi depi sou sòl nou. Se menm jan an tou nou pa t ap tolere pèsonn ki deyò ki ta konplote kont peyi nou”, se deklarasyon pwokirè jeneral adjwen divizyon sekirite nasyonal ministè jistis la, Matthew G. Olsen ki te pwofite kalifye plan sa tankou yon dram ki atake tout prensip ak valè demokrasi a.

Paralèlman, nan repatisyon plan ki abouti ak lanmò dènye prezidan eli Ayisyen an, pwokirè Lapointe akize epi mete Antonio Intriago, ak Arcangel Prete l kòm moun ki te nan planifye epi òganize plan pou te oswa bay prezidan an koudeta oubyen touye l. Pou zafè moun ki te gen misyon pou asire plan an an Ayiti ak sila ki te bay sòlda kolonbyen yo travay, li pa te di anyen sou sa, toujou daprè jounal ameriken an.

Nan kad enkèt k ap mennen yo, nan plent ki depoze douvan lajistis Ameriken an, yo prezante Arcangel Pretel kòm yon sous Federal Bureau of Investigation(FBI) te genyen tout pandan lanmò trajik Jovenel Moïse la, lyen ki ta pral sispann aprè evenman yo.

Pandantan sa, malgre tout rapò ki ta genyen ant 4 nouvo akize yo ki se Antonio Intriago, Arcangel Pretel, Walter Veintemilla, Frederick Bergmann Jr ak sila yo ki deja nan prizon yo, ni ankètè ameriken yo, ni lajistis ayisyen poko jwenn bon jan moun ki ta dèyè asasinay 58yèm prezidan an.

Atik sa se pwopriyete prive ©️ Gwoup Medya MAGHAITI 2023

Comments

commentaires