3 prezime bandi jwenn lanmò yo jodi madi 21 me 2024 la nan vil Mibalè, aksyon sa a fèt aprè lapolis te fin idantifye yo ta gen lyen ak gang. Selon sa a Polis Nasyonal la fè konnen, se popilasyon an menm ki touye endividi sa yo aprè yo menm yo te rive arete yo.
Djerby Alexis, Youncé Monplaisir ak Roseline Labrice se non gang sa yo ki rive jwenn lanmò yo jodi a. Si n kwè responsab yo nan lapolis la, jèn gason 24 lane sa ak 2 fanm sa yo mouri se aprè yon kontwòl idantite polisye Mibalè yo t ap mennen ki te vin bout ak arestasyon yo. Tousuit aprè youn nan yo ta pral revele li se yon manm gang.
«Djerby Alexis fè konnen tou li touye 5 moun ak men pa li epi te enplike nan atak yo te fè kont Sou Komisarya Bon Repo a kote 3 polisye te jwenn lanmò yo», daprè sa yo fè konnen nan yon nòt yo rann piblik sou kont fesbouk yo. Poutan, nan yon videyo ki pataje sou rezo yo menm endividi sa a ki t ap reponn kesyon Lapolis la te deklare li menm poukont li touye 5 polisye.
Anplis li depale pou di li te nan gang, PNH la soulinye Alexis ki rete nan Site Doudoun te di li enplike nan anpil zak kriminèl. Pami zak yo site yo, yo fè rapò ant li menm ak dife nèg ak zam te mete nan yon kamyonèt kote yo te boule tou vivan plizyè moun ki t ap sòti legliz.
Pou sa a ki konsène 2 medam yo, otorite polisyè yo mansyone yo te rete nan Ri Sant, nan Pòtoprens e yo fè pati gang k ap fonksyone anba lavil la. «Youncé nan tèt yon gwoup bandi ak zam k ap mache fè resèt nan mache Kwabosal, mache tèt Bèf», daprè presizyon biwo kominikasyon Lapolis la bay nan dosye sa a.
Atik sa se pwopriyete prive ©️ Gwoup Medya MAGHAITI 2024
