Nan yon kominike Lapolis mete deyò jounen jodi lendi 22 me 2023 a, Direksyon Santral Polis Jidisyè (DCPJ) fè konnen li te arete Mondesir Evens nan dat 17 me ki sot pase a, nan kad ankèt k ap mennen sou disparisyon Max Harry Titus, kòmkwa li ta yon moun ki enplike nan zak sila.
Sèvis kominikasyon PNH la fè konnen yo arete Evens aprè enstitisyon lapolis la te rive jwenn SIM telefòn viktim lan nan men li. « Se ansyen minis Kominikasyon ak Lakilti Limond Toussaint avèk yon machin nwa epi 2 lòt moun ki te fè zak sila», selon sa Mondesir Evens avwe.
Paralèlman, Lapolis Nasyonal Dayiti te pral tanmen yon lòt operasyon nan menm jou an nan yon lòt kay Limond Toussaint genyen nan Jakmèl, kote yo te pral jwenn yon gwo zam Kalib T65 ak seri 108439.
N ap raple Lapolis te gentan arete ansyen minis Kominikasyon ak Lakilti sou Jovenel Moïse la Limond Toussaint depi 18 me ki sot pase a. Pou kounya Lapolis rive arete yon lòt ki se Mondesir Evens epi mete l nan prizon annatandan lajistis fè suivi ki nesesè yo.
Atik sa se pwopriyete prive ©️ Gwoup Medya MAGHAITI 2023
