Jounen Jodi samdi 12 novanm 2022 a, plizyè ponp kòmanse vann gaz nan zòn Metwopolitèn lan, presizeman Ri 6 nan Kafoufèy, Dèlma, kafou Aryopò, klèsin bò èpòt la, elatriye.
Depi aprè gouvènman te anonse apati 9 pou rive 12 Novanm 2022, tout ponp y ap rive jwenn gaz pou yo distribye ak popilasyon an. Pandanstan, yo pa anonse si menm pri ap kenbe.
Gen anpil leve kanpe ki te fèt nan vil pwovens yo ak kapital la, kont ogmantasyon pri gaz la ak lavi chè epi mouvman pou egzije demisyon Ariel Henry. Sak te pral lakoz anpil moun mouri, blese epi arete kont ansanm revandikasyon sa yo.
Yon lòtbò, chèf gang G9 an Fanmi ak Alye, Jimmy Cherizier alyas Babekyou te bloke depi plis pase 6 semèn Tèminal Vare ki se pi gwo sant estokaj gaz nan peyi a. Nan dat Jedi 3 novanm ki sot pase a, Lapolis te anonse li debloke tèminal ak reprann kontwòl espas sa.
Jounen jodi a gen anpil kote ki kòmanse distribye gaz, sitou nan kapital la. Alòske pri kous machin ak moto epi pwovizyon yo rete tèt nèg. Fristrasyon popilasyon an ak kòlè kont chofè machin ak machann pa sispann, puiske de chak jou pi plis mizè ap ogmante an Ayiti.
Atik sa se pwopriyete prive ©️ Gwoup Medya MAGHAITI 2022
World
Discussion about this post