Nan yon rapò yo sòti ayè mèkredi 6 mas 2024 la, Rezo Nasyonal k ap Defann Dwa Moun yo (RNDDH), fè tout moun konnen gen plizyè polisye jounen jodi a k ap sibi menas nan men evade ki reprezante danje. Daprè sa yo revele, yo menm poukont yo ta gentan pale ak 4 polisye ki nan kategori sa.
“Kèk prizonye evade ki reprezante gwo danje deja kòmanse ap menase polisye(è) yo ki te patisipe nan operasyon ki te bout ak arestasyon yo. Sou pwen sa patikilyèman, RNDDH te pale ak omwen 4 polisye (è) ki jounen jodi a pè pou lavi yo, ak lavi manm nan fanmi yo“, selon enfòmasyon responsab yo bay nan rapò sila.
Nan ka sa, pou 2 prizon ki te kase nan lannuit 2 ak 3 mas la, yo fè konnen daprè chif Direksyon Administrasyon Penitansyè (DAP) yo te chaje ak prizonye ki t ap tann jijman yo, ki yo menm rive sove. Sa ki fè, pou penitansye nasyonal ki te gen 3 687 prizonye se sèlman 332 ladan yo(9%) ki te kondane. Kidonk 3 355 lòt ki egal ak 91 % t ap tann jijman yo, pou moman an 99 prizonye ki te deside rete yo selon responsab yo twouve yo nan Sant Reyensèsyon Timoun ki nan Pwoblèm ak lalwa(CERMICOL) annatandan dezisyon otorite penitansyè yo.
Pou sa ki konsène prizon sivil Kwadèboukè a li menm ki pa gen yon grenn prizonye ki te rete, nan dènye rapò DAP te fè 20 fevriye 2024 la, yo di te gen antou 1 036 prizonye ki te gen sèlman 231 ladan yo ki te kondane (22%). 805 lòt ki bay 78% te nan detansyon prevantiv. Mete sou sa nan komisarya Dèlma 33 a, gen 6 polisye ki te nan izolman ki yo menm chape poul yo depi 3 mas pase a.
Malgre tout sa yo, RNDDH kritike konpòtman polisye(è) yo ki jounen jodi a bandone lari Pòtoprens. Pou yo menm, se pa pi bon ajisman an paske okontrè prezans yo vle di anpil e l ka fè nou rejwenn kalm ki te genyen avan sa a.
Pou fini, rezo a mande pou sektè kle nasyon an degaje yo pou mete nan peyi a yon gouvènman ki pap pase anba pye dwa moun, ki ap gen ladan l fanm ak nonm ki dwàt, konpetan epi angaje. Mache pran tout evade yo, mennen ankèt sou prizon yo kase yo, ak sou polisye ki te sove kite komisarya Dèlma 33 a, arete, jije kondane tout sa k enplike nan konplotay kont sant sa yo, se pami rekomandasyon responsab yo fè.
Atik sa se pwopriyete prive ©️ Gwoup Medya MAGHAITI 2024
