Plizyè moun blese, plizyè kay kraze aprè yon toubiyon fin pase nan Basen Ble ki twouve l nan Nòdwès peyi a. Fenomèn meteyowolojik sa a vini kèk jou aprè ekspè nan meteyowoloji yo te anonse Ayiti ap fè yon semèn anba move tan.
«Nan Nòdwès, komin Basen Ble, yon toubouyon ki fèt nan zòn sa a lakoz anpil moun blese akòz fey tòl k ap vole, lopital Basen ble a prèske pa ka resevwa blese ankò», se sa responsab yo nan SOS Haïti-Météo fè
konnen. Se yon deklarasyon ki pa diferan pa rapò ak divès videyo ki montre fason van an t ap pote ale tòl yo nan zòn sa a.
Menmsi pa gen okenn chif ki disponib pou konn kantite dega materyèl ki genyen, men selon temwanyaj nou jwenn nan men plizyè abitan, anplis Basen Ble ki touche zòn tankou Lasous, Ti Boukan, Fon Papay fè fas ak toubiyon sa a tou. Pou kounye a, Radyo Volcan FM ta youn nan espas ki plis viktim yo.
Pandan toubiyon sa a pase nan peyi a jodi madi 21 me a, n ap raple gen youn ki te pase e te fè gwo dega nan Ouston (Etazini) samdi ki te 18 me 2024 la. Nan vil Oklahoma, sitiyasyon an pa t diferan, puiske vil sa a tou te sibi menm fenomèn sa a.
N ap fè konnen, nan moman sa menm, selon ekspè yo, nan peyi Karayib yo sitou Ayiti, gen yon “creux en Altitude” k ap travèse yo. Se pou sa a, yo mansyone anpil depatman gentan ap sibi enpak yo paske yo eksplike gen anpil lapli k ap tonbe, sa a ka pèmèt inondasyon ak deboulonnay tè.
Atik sa se pwopriyete prive ©️ Gwoup Medya MAGHAITI 2024
